Borgmesteri: Ilulissani takornariat tikittarnerat pitsaanerusumik aaqqissuunneqartalertariaqarput

Takornariarpassuit Ilulissanut ataatsikkut tikittarnerat, Avannaata Kommuniani borgmesterip kissaatiginngilaa.
Takornariat amerlasoorpassuit ataatsikkut tikikkaangata, illoqarfimmi neqeroorutigineqarsinnaasut takornariagassallu inorsinneqartarput.

Takornariat Ilulissanut corona peqqutigalugu tikittarsimanatik maanna takussaaqqilerput.

Takornariat Ilulissanut corona sioqqullugu tikittartunut sanillillugit maanna amerlanerit tikittarput.

AAMMA ATUARUK Umiarsuit takornariartaatit tulattussat aatsaat taama amerlatigisut

Takornariat Ilulissanut aasarmanna tikittartut amerlapput. Amerlavallaangajallutik.

Takornariat aasarmanna tikittut amerlapput taakkualu misigisassaat killileqalertarput.

Avannaata Kommuniani Borgmesteri Attaviitsoq, Palle Jeremiassen, taama isumaqarpoq.

Takornariat amerlasuut ataatsikkut tikittarnerat isumaqatiginngilaa - aaqqissussamilli tikittarnissaat kissaatigalugu.

- Takornariat imminnut qaleriissaakkunnaarlutik tamarmik nipaassuseq pinngortitarlu immikkuullarissoq tamarmik takusinnaasariaqarpaat. Taammaattumik taama oqariartorpunga.

Illoqarfimmi takornarianit ornigarneqartartut artukkerneqartut

Palle Jeremiassen taama oqarpoq.

Takornariat amerlasuut ataatsikkut tikikkaangata takornariarfigineqarsinnaasut kisimik eqqorneqarneq ajorput.

Inuit tuusinitilkkuutaat tikikkaangata unnuisarfiit neriniartarfiit takornariarfigineqartartullu artukkerneqartarput.

Takornariat ikinnerulernissaannik kissaateqarani, Palle Jeremissenip erseqqissaatigaa.

Kisiani Naalakkersuisut taamatullu Visit Greenlandip pitsaanerusunik pilersaarusiortarnissaat ujartorpaa.

AAMMA ATUARUK Ilulissat takornariarfissatut piukkunnartunut allattorsimaffimmiittoq

Palle Jeremiassenip takornariat tikittarnerat qanoq aaqqissorneqarsinnaanersut ima nassuiarpaa:

- Umiarsuaq ullormut ataaseq, amerlanerpaamik inuit 1000-t, taavalu siaarlugit. Taamaasillutalu siaarutsigit umiarsuatigut, angallatitigut illoqarfimmilu angallassissutinut kivissinnaasatsinnik takornariaqarneq ineriartortissinnaassavarput.

Avannaata Kommuniani borgmesteri taama oqarpoq.

Taassuma oqarnera naapertorlugu Kalaallit Nunaanni illoqarfimmi takornariaqarnerpaaffiusartuumi innuttaasut takonarianit pissarsiarisartagaat naammanngillat.

Takornariallu umiarsuarmik takornariartaatinik tikittartut Ilulissanut tikitsinnatik illoqarfinnut allanut tikittartut pilerigisatillu taakkunani pisiarereertaraat, taassuma ilanngullugu erseqqissaatigaa.

- Aningaasatigut tunniussaqarneq ajorput. Aningaasanik tunniussisartut tassaapput hotelimi najugaqartut.