Umiarsuit takornariartaatit tulattussat aatsaat taama amerlatigisut

Ukiuni kingullerni marlussunni takussaarpianngitsut takussaaqqilerput.

Takornariat assiliivilisartut asimiissutissaqqittunillu kamippallit aqqusinermi takussaapput.

Takornariartaassuarnimmi tikillattaasoqarpoq. Coronallu ukiuni kingullerni marlussunni tunillaassuunnerani takornariaqarpianngereersorlu ukioq manna takornariaqarluarpoq. Takornariartaassuit 50-it missaanniittut taakkunanilu ilaasut 20.000-t 22.000-llu akornanni amerlassusillit Nuummut aasaq manna tikissasut, Sikuki Nuuk Harbourip naatsorsuutigaa. Tikittussat coronap tunillaassuutilinnginnerani tikissimasuninngarnit amerlanerungaatsiarput. Takornariartaassuit 2017-ip 2019-illu akornanni tikittut 34-t 36-llu akornanni amerlatigipput.

AAMMA ATUARUK Nunatsinni takornariaqangaatsialernissaa ilimagineqarsinnaavoq: Piareersarnerit qangali aallartinneqarsimassagaluartut

Aasaq manna pisarnermit ulapaarnerussallutik,  takornariartitsivimmik tarkornariartaassuarni ilaasunik angallasisartumik asiartitsisartumillu Greenland Cruisesimik piginnittoq Ivik Knudsen-Ostermann oqarpoq.

- Ulappunneq sungiuteqqinniarsaraarput. 2019-mi ulappuppugut, takornariartaassuarnilli tamatuma kingorna ukiuni tulliuttuni marlussunni tikittoqartanngimmat ulapputeqanngilagut. Maannali 2019-mi ulappunnitsitulli ulapputeqqittussanngorpasippugut, taanna oqarpoq.

Ukiuni kingullerni marlunni pisut suliffeqarfimmut Greenland Cruisesimut aningaasaqarniarneranullu ajornartorsiortitsipput, ukioq mannali allatorluinnaq isikkoqarpoq. Nunarput takornariarfissatut soqutigineqarluartoq, suliffeqarfiup arajutsisimanngilaa.

- Nunarput soqutgineqaleraluttuinnarpoq. Takornariartaassuarni ilaasut taama taasinnaagaanni qeersaakkajupput aningaasaateqarluartut, Ivik Knudsen-Ostermann oqarpoq.

Qularuteqartariaqanngitsut

Nuummi takornariartitsivik alla aamma angallassisartoq, Nuuk Water Taxi, takornariartaassuarnik tikerartoqarnerani ulapputtunut aamma ilaapput.

Takornariaqartitsivik taanna pisarnermit ingammik juulimi ulappaarneruvoq. Tassami aggustimi septemberimilu ulapaakkajuttaramik tamanna tupaallaatigisimagitsik, pisortaq Anders Lykke Laursen oqarpoq.

- Nunatsinni takornarialerisut ilarpassuisa coronap nunarsuaq tamakkerlugu tunillaassuutilinnginneranitulli qaqugorpiaq takornariaqarluaqqittalernissatsinnut qularuteqartarput. 2019-mili taamanikkut aatsaat taama ulappunnitsinneruninngarnit aasaq manna ulapperunneruvugut, taanna oqarpoq nangillunilu:

- Tikeraat nunatsinni misigisassarsiornerminni nuannisartaqaat, tamannalu assorsuaq iluarisimaaqalugulu nuannaarutigeqaarput.

Takornariarpassuaqarnerali aamma unammillernartoqartitsisoq, Greenland Cruisesimik piginnittoq Ivik Knudsen-Ostermann oqarpoq.

Takornariartitsivimmi taanna takornarianik angallasisinnaasunik nunatsinneersunik sulisussaaleqivoq.

- Angallassisartut ukiuni kingullerni marlunni angallassinikuunngillat allanillu suliaqalernikuullutik. Taamaammat najukkatsinneersunik angallassisussarsiorneq aamma ulapputigaarput, Ivik Knudsen-Ostermann oqarpoq. 

Takornariartaassuit 62-it takornarianik katillutik 20.000-nik ilaasullit Ilulissanut tikissangatinneqartut, Visit Greenland nittartakkamini allappoq.

Takornariartaassuit ukioq manna tikittut ukiut siuliini tikittuninngarnit qanoq amerlanerutiginersut paasiniarlugu, KNR-ip Visit Greenland attaveqarfigaa, ilanngutassialli matuma saqqummiutinnginnerani tassannga akissutisinani.