Nunatsinni takornariaqangaatsialernissaa ilimagineqarsinnaavoq: Piareersarnerit qangali aallartinneqarsimassagaluartut
Nunatsinni mittarfissuit oqallisaajuarput piareersartoqaleruttorporlu.
Nuuk Watertaxi-mik piginnittoq Anders Lykke Laursen piareersarpoq. Naammi Nuummi Atlantikoq qulaallugu mittarfissaq pilersaarutit malillugit aatsaat 2024-p naanerani naammassisussaagaluartut takornarialerinermik suliaqartunut mittarfissuup ammarnissaanut maanna ulapputilereerput.
- Nuummi, Ilulissani Qaqortumilu nutaanik mittarfiliortoqarpoq.
- Nuummi Ilulissanilu mittarfiit 2024-mi piareersimassangatinneqarput Qaqortumilu mittarfik 2025-mi piareersimassangatinneqarluni.
- Mittarfiit nutaat nunatsinni sanaartornermi qaluttuarisaanermi annerpaapput.
Taassuma takornariaqartitsivia takornarianik angallassisartoq Nuup kangerluani tupermi unnuerusuttunut Camp Kangiusamik ammaavoq.
- Misigisassianik soorunami neqerooruteqarnerorusuppugut, sulisoqarnikkulli aamma inerisaarusuppugut. Takornariaqarnerulernissaanullu piareersimarusulluta takornariaqartitsivipput ineriartortipparput, allaffeqarfitsinnilu assigiinngitsunilu atorfiit assigiinngitsut inuttalerlugit, Anders Lykke Laursen oqarpoq.
Takornariarpassuussasut
Air Greenlandip Nuummi Ilulissanilu mittarfissuaqalerpat Qaqortumilu nunap immikkoortuani mittarfeqalerpat takornariat qanoq amerlatigisut nunatsinnukarniarlutik aningaasartuuteqarusussanersut suli missiliunngilaa. Timmisartuutileqatigiiffiulli takornariaqarneq ineriartorumaartoq naatsorsuutigaa. Timmisartuutileqatigiiffik KNR-imut akissummi allappoq.
- Nunatsinni takornariaqarneruleriarpat takornarialerisoqarnerulissasoq tamannalu soorlu unnuiffiusinnaasunik misigisassarsiorfiusinnaasunillu neqerooruteqarnerusariaqarnermik malitseqassasoq Air Greenlandip ilimagaa, timmisartuutileqatigiiffiup tusagassiisartua Inga Dóra Guðmundsdóttir Markussen allappoq.
Camp Kangiusaq Nuuk Water Taxip takornarianut neqeroorutaani nutaajuvoq.
Nuummi Ilulissanilu mittarfissuassat 2024-mi piareernissaat naatsorsuutigineqarpoq, Qaqortumilu mittarfissaq 2025-mi piareersimassangatinneqarluni.
Sulisitsisut mittarfiit nutaat nunatsinni takornariaqangaatsiaqalersitsinissaat aamma naatsorsuutigaat. Naalli tamanna pitsaasuugaluartoq kiffartuussinermi sulisussaaleqinermik kinguneqarsinnaavoq.
- Takornarialerisutut ilinniarsimasunik naammattunik sulisoqarnissaa qulakkeerniarlugu qangalili piareersalereersimasussaagaluarpugut. Kingusinaartoqanngisaannarporli, Karsten Lyberth-Klausen oqarpoq.
Skal uddannes langt flere hænder
Nunatsinni sulisussat piareersimanngippata nunatsinnit avataanit tikisitsisoqartariaqaratarsinnaavoq. Tamanna Sulisitsisut allattoqarfiani pisortap nassuiaatigaa:
- Piareersimalluarniarutta nunatsinni takornarialerinermik ilinniarsimasut amerlanerusariaqassapput, sulisussarsilertornissarlu qulakkeerniarlugu avataaniit Europameersuunngitsunik aamma tikisitsiortortariaqaleriaannaavugut.
Avataanit tikisitsigaluartoqarsinnaaneranut aaqqiissut nunatsinni atugaareerpoq. Taanna inunnut suliffeqarfinni, Naalakkersuisut akuereriigaani atorfininnissamut neqeroorfigineqartunut immikkut ittumik aaqqiissutaavoq. Aaqqiissut taanna pissutigalugu Nunanit avannarlernit Europamiillu sukkanerusumik atorfinitsitsisoqarsinnaavoq. Aaqqiissulli nunarsuarmi sumiiffinnit allaneersunut atuutinngilaq.
Takornariaqartitsivimmik piginnittup, Anders Lykke Laursenip sulisunik amerlanerusunik ilaatigut atorfinitsitsiortornermik piareersarnermut ilaasoq paasisinnaavaa, taamaalilluni takornariaqarnerulernissaanut sullissisinnaassalluni. Aamma naak sulisut amerlasuut maannakkorpiaq pisariaqartinneqanngikkaluartut.
- Piareeqqissaartoqarsinnaanersoq naluara, misigivungali piareersimalluarnissatsinnut sapinngisamik piareersarluarluta, taanna oqarpoq.
