- Ersarittumik oqaatigeqqissinnaavara, uagut suliffeqarfiup tungaaninngaaniit immikkut, tassa allaninngaanit ajunnginnerusumik peqarnissamik oqariartuuteqarnikuunnginnatta.

Royal Greenlandip siulersuisuini siulittaasup tullia Niels Thomsen aalisarnermut inatsisissatut siunnersuut Royal Greenlandip qanoq isumaqarfigineraa KNR-imit aperineqarami taama oqarpoq.

Royal Greenland immikkut ittumik suliffeqarfinnullu namminersortunut sanilliullugit amerlanerusunik aalisagartassinneqartarnissaa inatsimmi siunniunneqarpoq.

Royal Greenlandilli tamanna piumasarisimanngikkaa siulittaasup tulliata erseqqissaatigaa. Atugassarititaasullu allanngortinneqarpata Royal Greenlandimut kinguneqartussaasoq Royal Greenlandimit erseqqissaatigineqarpoq.

- Tunisassiorfiit imminut akilersinnaanngitsut  2023-mi ammatinneqarnerat 200 million koruunniik naleqarsimavoq.Taava aamma uagut suliffeqarfittut imminut oqimaaqatigiittumik aningaasaqarnerput inissisimaannaqqullugu, taava aamma qiviartariaqalissavarput, aningaasarsiornerput qiviaraanni, suunuku akilersinnaasut suulluuku aamma akilersinnaanngitsut, Niels Thomsen oqarpoq

Inuiaqatigiinni akisussaaffik

Namminersorlutimmi Oqartussat pigisarimmatsik namminersortunut sanilliullutik allanik assigiinngiiaarnerusunillu pisussaaffeqarput, Royal Greenlandimit tunngavilersuutigineqarpoq.

Saarulliit 2023-mi, ukiunilu siuliini aamma nipisat suai akilersinnaanngitsumik ingerlattarsimavagut. Kisianni aamma nalunnginnatsigu aalisartorpassuarnut isumalerujussuusoq, Niels Thomsen oqarpoq.

Royal Greenland niuernikkut ingerlatsinermik pikkorippallaannginnerarlugu piffissami kingullermi isornartorsiorneqarpoq, suliffeqarfissuup aalisarneq pillugu inatsisissami inissisimanera eqqarsaatigalugu, taamaattumillu suliffeqarfinnut namminersortunut sanilliullugu immikkut pineqarnera naapertuutinngitsutut oqaatigineqarluni

Suliffeqarfik Namminersorlutik Oqartussanit, tassalu akileraartartunit, pigineqartoq niuernikkut akisussaassusilimmik ingerlatsinissaanut inuiaqatigiinni pisussaaffeqassannginnersoq apeqqutinngorpoq

tamanna pillugu Niels Thomsen ima akivoq:

- Inuiaqatigiit kalaallit pigimmatigut, uagut nammineq suliffeqarfik piginnginnatsigu, inuiaqatigiit sinnerlugit, imminut illersorsinnaasunut ingerlatsisariaqaratta,

Milliardit koruuninik akiitsulik

Tamatuma qaavatigut Royal Greenlandip ukiuni kingullerni ukiumoortumik naatsorsuutai naapertorlugit tre milliarder kooruuninik aamma akiitsoqarpoq .

Akiitsut amerlanerujussuannut suliffeqarfissuup siunissaa qulakkeerniarlugu aningaasaliisoqartarnera Royal Greenlandip pissutaatippaa.

Akiitsorpassiuilli taakkua suliffeqarfissuup arajutsisimanngilai.

- Akiitsut annertunerat, ulluinnarni sulinitsinni initoorujussuuvoq, aamma pilersaaruteqarpugut assigiinngitsunik, akiitsutta apparsarneqarnissaanik suliniutinik, aallartisaareersimavugut aamma, Royal Greenlandimi siulersuisut siulittaasuata tullia oqarpoq, akiitsullu qaqugu qanorlu akilerneqassanersut taassuma erseqqinnerusumik oqaatiginngilaa.

Aalisarneq pillugu inatsisissatut siunnersuummi Royal Greenland immikkut ittumik pineqarnissaminik kissaateqarsimanngilaq. 

Inatsimmi tunngaviusoq allanngortinneqarpat, suut akilersinnaanersut suullu akilersinnaannginnersut Royal Greenlandip isiginiartariaqarpai, siulitaasup tullia taama oqarpoq.