Erik Jensenimut tatiginnikkunnaarnermik taasinissaq siunnersuutigineqartoq
![](/sites/default/files/styles/image_934x467/public/2023-10/TIL%20WEB%20Erik%20Jensen%20om%20Markus%20E.%20Olsen%20GAO.jpg?itok=wEy3QA1Y)
Erik Jensen (Siumut) Inatsisartunut eqqunngitsumik paasissutissiisimasoq, partiit Demokraatit aamma Atassut isumaqarput.
Taamaattumik Aningaasaqarnermut Akileraartarnermullu Naalakkersuisoq Erik Jensen pillugu tatiginnikkunnaarnermik taasinissamut siunnersuuteqarput.
Pineqartorli eqqissisimavoq.
- Eqqissisimavunga. Suliara ilumoorullugu suliaraara, Erik Jensen oqarpoq.
- Partiima tapersersoraanga nalunngilara, taamaammat unnuakkut sinilluartarpunga, taanna oqarpoq.
Siumumeersoq Karl Tobiassen minuttialuit qaangiuttut oqaluttarfimmiippoq tatiginnikkunnaarnermillu taasinissaq pinngitsoortillugu. Siumut IA-mit taperserneqarpoq, taamaattumillu Inatsisartuni amerlanerussutillit naalakkersuisoq Erik Jensen taperserpaat.
Erik Jensenimik tatiginnillutik 17-it taasipput, pingasut tatiginninnatik taasisut sisamallu taasinngitsut. Taamaattumik Erik Jensen naalakkersuisuuinnassaaq.
Tusaatissatut tigugaa
Taanna tatiginnikkunnaarnermik taasinissamut siunnersuuteqartoqaqqammersoq ataatsimiinnerup unillatsiarnerani KNR-ip oqaluuppaa.
Ataatsimiinnerup unitsinneqarnera tatiginnikkunnaarnermik taasinissamut siunnersuuteqartoqarneranik pissuteqarpoq, aammali taxartitsisut kamaqqasut unioqqutitsilluni taxartitsisarneq pillugu akerliussutsimik takutitsisut Inatsisartut saaniittut pissutaapput.
Naak Erik Jensen eqqissisimagaluarluni tatiginnikkunnaarnermik taasinissamut siunnersuuteqartoqarnera tusaatissatut tigunerarlugu oqarpoq.
KNR-i partii Atassummiit oqaaseqartitsiniaraluarpoq, sulili iluatitsinani, aamma Demokraatineersup Anna Wangenheimip tatiginnikkunnaarluni taasinissamik siunnersuuteqarneq oqaaseqarfigerusunngilaa.
Demokraatilli siulittaasuat oqaluttarfimmiit oqaaseqarpoq.
- Naalakkersuisup (Erik Jensen, aqq.) oqaatiginikuusani akisussaaffigigai aamma qimarratigissanngikkai isumaqarpugut. Nioqqutissarpassuit akikillisut taassuma ilaatigut oqaatigaa. Sodavandit sikullu akikinnerusut.
- Sukkulli siilipilu kisimik pineqarput. Pineqartup taamani kukkusumik oqaaseqarsimanera nassuerutigineqarnikuunngilaq.
- Inuiaqatigiit eqqunngitsumik paasissutissinneqarput, akuerisinnaanngilarpullu. Taamaattumik naalakkersuisumut tatiginnikkunnaarnerput suli attapparput, Jens Frederik Nielsen oqarpoq.
Atassummeersoq Aqqalu C. Jerimiassen aamma taamatukanneq oqarpoq.
- Akitsuutit peerneqarnissaat taassuma januaarimi eqqunngitsumik paasissutissiissutigaa, Atassutip siulittaasua oqarpoq.
Taamaattumik naalakkersuisumut tatiginnikkunnaarneq tunngavissaqartoq taanna isumaqarpoq.
- Taamaattumik naalakkersuisoqatigiit tapersiissanersut paasiniarlugu taamaaliorpugut.
Sukkunut akitsuut paatsuungassutaasoq
Erik Jensenip KNR-imit ukioq manna siusinnerusukkut apersorneqarnermini oqaaseqarnera tatiginnikkuunnaarnermik taasinissamut siunnersuuteqarnermut pissutaavoq.
Nioqqutissarpassuimmi akikillissasut taassumami oqaatigaa, ilimagineqaraluartutulli amerlatigisut akikillinavianngitsut paasinarsivoq. Innuttaasut politikerillu akornanni paatsuungasoqalerpoq, aamma Erik Jensen naammineq paatsuungalerpoq.
Taanna januaarimi apersorneqarami ima oqarpoq:
- Tassa assigiinngitsorpassuupput sukkut, taamaattumik oqaatigiuminaappoq sorlerpiaassanersut, kisianni oqareernittuut sikuniusinnaavoq, imeruarsaatiniissinnaavoq assigiinngitsorpassuarnilu.
Nioqqutissalli sorlerpiaat akitsuuteqassannginnersut suli paatsuungassutaasoq. Akitsuutillu ukiortaamiit peerneqarmata nioqqutissat aalajangersimasuinnaat akitsuutaarupput.
Tassa sioraasat, melisit sirupillu assigiinngitsut kisimik akitsuutaarupput.
Erik Jensenili suli naalakkersuisuuinnassasoq naalakkersuisoqatigiit aalajangerpaat.
- IA Siumullu tatiginnimmata qutsavigaakka. Illuatungiliuttut oqariartuuteqarnerat pillugu nasaarfigaakka, qujanarlu peqataagassi, Erik Jensenip Aningaasaqarnermut Akileraartarnermullu naalakkersuisuuinnarnissi paasinarsimmat oqaluttarfimmiit oqarpoq.