Illut aserortertut takornariaqarnerlu pillugu inatsit nutaaq ukiakkut ataatsimiinnermi initussasut
![](/sites/default/files/styles/image_934x467/public/2023-09/inatsisartut4.jpg?itok=5o7QvCWy)
Ineqarneq, takornariaqarneq aningaasanullu inatsit nutaaq.
Naalakkersuisut siulittaasuata, Múte B. Egedep septembarip 20-ani ammaanersiornermi oqalugiarnerata kingorna sammisassat pingasut anginerit taakkuupput.
KNR-ip politikkikkut oqaaseqartartua, Ineqi Kielsen Siumumit Inatsisartunut ilaatigut ilaasortaasimasoq taama oqarpoq.
- Takornariaqarneq ataatsimiinnerup ilarujussuani sammineqarnissaa ilimagaara. Inatsisissatut siunnersuutit arlallit takornariaqarnermut tunngapput.
- Tamatuma saniatigut Inatsisartuni ilaasortat arlallit takornariaqarnermik nutarterinissaq takornariaqarnermullu inatsit ataqatigiissaarnerusoq kissaatigalugu oqariartuutiginikuuaat, taanna oqarpoq.
Taassuma takornariaqarnermut inatsit nutaaq naalakkersuisut ukioq manna siusinnerusukkut saqqummiussaat innersuussutigaa. Inatsit taanna pilersaarut malillugu oktobarip pingajuani pingajussaaneerneqassaaq.
Takornariaqarnermut inatsisip nutaap aamma aningaasanut inatsisissaq septembarip 24-ani siullermeerneqartussap saniatigut nunatsinni ineqarnermut pissutsit Inatsisartut ataatsimiittarfianni ukiakkut ataatsimiinnermi matumani sammineqangaatsiassasoq Ineqi Kielsen siulittuivoq.
![](/sites/default/files/styles/image_934x467/public/2024-05/Ineqi%20kikker%20i%20kameraet.jpg?itok=hhdcQ9rY)
- Inatsisissatut siunnersuutit arlallit inissianut tunngapput, taanna oqarpoq.
Tamatuma saniatigut IA-p Siumullu akornanni ineqarnermut aaqqissuusseqqinnissamut politikikkut isumaqatigiissuteqartoqarsimasoq ineqarnermut attaveqaasersuutinullu naalakkersuisup, Hans Peter Poulsenip (Siumut) maajimi nalunaarutigaa.
Naalakkersuisoqatigiinni partiit taamaalillutik Namminersorlutik Oqartussat inissiaataat– aserorluinnarsimasutut piffissami sivisuumi isornartorsiorneqartut – nutarterneqarnissaat ilaatigut isumaqatigiissutigaat.
Tamanna qinersisartut kissaatigisaraat.
- Pingaartumik pisortat inissiaataanni ineqartut tamanna kissaatigaat, Ineqi Kielsen oqarpoq.
- Taamaammat innuttaasut ukiunut tulliuttunut sisamanut qinigaatitarerusutaminnik qinersinnginneranni naalakkersuisut qinigaaffimmi matumani inatsisinik taakkuninnga siunnersuuteqarnissaq pingaarnersiungaatsiassagaat aamma ilimagaara.
Ataatsimiinneq marlunnut avissimasoq
Ataatsimiinnissap ukioq manna marlunnut avinneqarnikuunera eqqumiippasissinnaavoq.
Siullermik septembarip 20-anit novembarip 21-anut ataatsimiittoqassaaq. Aappassaani februaarip sisamaannit sapaatini akunnerni marlunni – februaarip 19-iata tungaanut ataatsimiittoqassaaq.
Ineqi Kielsen aperigaanni tamanna nutaarsiassaanngilaq – assingusumillu taama ataatsimiittoqareernikuulluni.
- Ukiuni kingullerni aalajangiiffigisassatut inatsisissatullu siunnersuuterparujussuit misissorneqartussat Inatsisartut Allattoqarfiata malinnaavigisinnaanikuunngilai, Ineqi Kielsen oqarpoq.
Ataatsimiinnerup piffissamut sivisunerusumik siammarneratigut ataatsimiititaliat allaffissornerillu piffissaalatitsinerat sulinerulunnerallu qasukkarniarneqassaaq.
- Taamaaliornikkut ullumikkornit immaqa pitsaanerusunik suliaqarsinnaanissaq neriuutigineqarpoq, taanna oqarpoq.
2021-mi ukiakkut ataatsimiittoqartussanngortinneqarmat ukiakkut ataatsimiinneq aamma avinneqarpoq. Tamannali qinersisoqartussanngornera pissutigalugu taamaatiinnarneqarpoq.