Naalakkersuisup inissiamut akit qaffannissaat eqqarsaatersuutigigaa

Ineqarnermut naalakkersuisup, Hans Peter Poulsenip (S) Namminersorlutik Oqartussat inissiaataat nutarterneqassasut tallimanngormat oqaatigaa.

Tamanna piffissami sivitsortumi arlaleriarlunilu oqaluuserineqarnikuuvoq.

Tamatumuunali IA-p Siumullu isumaqatigiissut Namminersorlutik Oqartussat inissiaataasa aserfallassimasut nutarterneqarnissaannut pisussaaffiliisoq atsiorpaat.

Tamannali aamma kisiat oqaatigisinnaavaa.

Inissiat qanoq amerlatigisut pineqarnersut imaluunniit tamanna nunatta karsianut qanoq akisutigissanersoq nalunarpoq.

Taassumali tassunga aningaasaliinissap ilaa inissiani najugaqartunut ineqarnermut akitsuinermiissanerarpaa. Inissiallu ukiut 15-t 20-llu tulliuttut ingerlaneranni nutarterneqarnissaat siunertarineqarpoq.

- Una aallaavigivarput kalaallit nunatsinni inissiaqarnermik inissisimanerat pitsanngorsaavigissallugu annertuumik, taamaalilluni ilaqutariit aningaasaqarniarnermikkut ilaatigullu aamma peqqissutsikkut atugarisaat pitsanngorsaavigissallugit, taamaaliorpugut ilaatigut naalakkersuisuninngaanniit ineqarnikkut aaqqissuusseqqinnermik aallaaveqarluta, Hans Peter Poulsen tallimanngormat oqarpoq.

Tamangajammik najugaqarfigineqarsinnaanngitsut

Namminersorlutik Oqartussat inissiaataasa pitsaassusaat pillugu kisitsit kingulliit 2016-imeersut naapertorlugit Namminersorlutik Oqartussat inissiaataannit 6000-it missaanneersunit 217-it najugaqarfigineqarnissamut naleqquttuupput.

Tassa imaappoq inissiat 5.800 missaanniittut ajugaarmata nunguterneqartariaqartut nalilerpoq.

Inissiat 5.800-it iluarsagassatut pineqarpat?

- Tassa inissiat taamatut nalunaarsorneqarsimasut taamatut pineqarput.

5.800-it aserfallassimasut isasuuinnginneranni iluarsartuunnissaat angumerisinnaassavisigit?

- Tassa taanna nalunaarsuineq ukiorpaalunni ingerlanikuuvoq nunarput tamakkerlugu, inissiaatit nalunaarsorneri qanoq inissisimavinneri eqqarsaatigalugit, aserfallakkaluttuinnarneq ullumikkut nalaateqqasarput qanoq iliuuseqarfiginngikkutsigu suli annertusiartorpoq ullut tamaasa annertusiartorpoq.

- Taannalu pillugu uku suliagut aallartissavagut tulleriiaarinerit ilanngullugit. Tassani pingaarnerpaavoq aserfallakkaluttuinnarneri siullermik unitsinnissaat, unitsereerpat ineriartortitsineq aallartissinnaaniassammat, taamaammat upperiivipparput suliap taassuma aallartinneqarnissaa.

Tassa imaappoq taakkua 5.800-it angumerissavasi?

- Tassa pilersaarutaavoq. Aammalu neriuutigivarput tamaasa angussallugit aammalu upperinngikkaluarutsigu una suliassaq taamatut aaqqinneqarsinnaasoq taava aallartinnavianngikkaluarparput.

- Taamaammat naalakkersuisuninngaanniit pilersaarutit saqqummiussassat neriorsuutigut taakku takkuteriarpata ersarississaaq qanoq iliorluta taamaasiussasugut.

Pilersaarut naalakkersuisup, Hans Peter Poulsenip innersuussutigisaa ukiup qiteqqunnerani naammassissaaq, tassanilu suminngaanniit aningaasaliisoqassanersoq, inissiat sorliit iluarsartuunneqassanersut, sumit aallartittoqassanersoq qanorlu akeqassanersut takutinneqassaaq.

Inissianut akitsuineq?

Aningaasat suminngaanniit aaneqarnissaannut takorluugaqalereerpisi?

- Tassa massakkut suliagut ingerlanneqarput, aallaavigalugit qanoq aningaasalersorneqarnissaat iluatsissinnaaneripput, massakkut naammassinngilaq. Neriukkaluaratta naammassereersinnaassallugu kisianni isumaqatigiissummut ilanngupparput partiit isumaqatigiittut pituttorpaanga naalakkersuisutut pilersaarummik ersarissumik ukiup uumap qiteqqunnerani saqqummiussissasunga, taannalu aallavigalugu saqqummiutissavarput.

Maannakkut oqarutta maannakkut maajimiippugut, qaammatip tulliani imaluunniit juulimi?

- Tassa uaniippugut ukiup qiterparnerani tassa juuni, juuli immaqa eqqartorneruarput. Tassanilu pingaaruteqarpoq oqaatigissallugu suliaq annertungaatsiarpoq aningaasarpaalunnillu naleqarpoq, taannalu pissutigalugu imaaliallaannagassaanani, kisianni pituttuinerup isumaqatigiissutip pisussaaffilerpaatigut massakkut pimoorutiivillugu ukiorpaalunni ingerlatassaq aallartissagakku massakkut.

Inissianik attartortut attartornerminnut inissiamut akiliuteqarnerusalissappat?

- Nalimmassarneqassapput, kisianni neriorsuutigisinnaasara uaniippoq pitsanngorsaaneq ilutigalugu akit nalimmassarneqarnissaat avaqqussinnaanngilarput. Oqaatigisinnaanngisara uaniippoq qanoq annertugisumik taanna pissanersoq imaluunniit qanoq annikitsigisumik pissanersoq.

- Taamaammat uaniippoq nalimmassarnissaq, massakkullu kinguaassatsinnut tunniuteqqissanngikkutsigu akiligassartaa, taava massakkuuvoq nalimmassarnissap ingerlannissaa ukiuni 15-it tikillugit ingerlasussami.