Politiit ullormut nalunaarutaat: Annaassiniartartut laserinik qinngornernik akornusersorneqartut

Qulimiguullit atorlugit annaassiniartartut laserimik qorsummit unnuap ingerlanerani qaalluitsitinneqarsimapput Tamanna pillugu suliaq Kalaallit Nunaanni Politiit ilungersunartorujussuartut isigivaat.

Allattoq Mads Lynge

septembarip 10-at 2024 09:43

SAR-imik qulimiguulimmik annaassiniartartut unnuaq nalunaaquttap ataatsip qaangilaarnerani nalunaaqutaq 01:17 Nuuk qulaatsillugu laserimit qorsummit qaalluitsitinneqarsimapput.

- Suliaq manna ilungersunartorujussuartut politiinit isigaarput, timmisartortartummi qaalluitsitinneqarput,Kalaallit Nunaanni Politiit pigaartuisa pisortaat Jeppe Andsager oqarpoq.

Aamma atuaruk Politiit ullormut nalunaarutaat: Angut imigassartorsimatilluni Uummannap eqqaani umiatsiaararsimasutut pasineqartoq

Politiit tamanna pillugu takunnissimasunit, ilisimannittunit ikioqqupput, politimmi paasiniaarnerminni paasissutissanik amigaateqarput.

- Laserip suminngaanneersuunera ilisimakannerparput, pisuinnaalli biilertullu laseri atorsinnaavaat, tamannalu pillugu paasissutissanik amigaateqarpugut, politiit pigaartuisa pisortaat oqarpoq.

Igalaaq aserorneqarsimasoq tillinniarnerlu

Politiit suliamut allamut atatillugu aamma paasiniaapput, Nuussuummi atuarfiani unnuaq tillinniartoqarsimavoq, igalaaq unnuaq nalunaaqutaq marlunngulernerani nalunaaqutaq 01:53 aserorneqarsimavoq, allaffillu ujaasiffigineqarsimarpasilluni. Filmiliuutiniit asseqarnersoq paasisssutissanillu tassuunatigut pissarsisoqarsinnaanersoq politiit maanna paasiniassavaat, politiit pigaartuisa pisortaat oqarpoq.

Innuttaasuniilli aamma ikioqqupput, ilisimannittoqarpat saaffiginneqquneqarlutik. Nuussuup atuarfiani tillinniartoqarneranut tunngasumik, laserimillu akornusersuisoqarsimaneranut tunngasumut ilisimannittussarsiorlutik.

Kalaallit Nunaanni Politiit oqarasuaataasa normoraat 70 14 48.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.