VIDEO: Blok P'p paasiniaaffiginerani politiit video atorpaat
Tamanna ilutigalugu politiit aamma Kalaallit Nunaani sulllivinnik nakkutiliisoqarfiup ajutoorneq pillugu misissuinertik ingerlatileruttorpaat.
Angut assaassuarnik aquttoq 57-nik ukiulik pukutsumi qiteraliatigut Rigshosptal-imi suliaritinnermi kingorna ajunngilaq maannalu pisuttarpoq, inissiarsuup Blok P-ip piiaarneqarnerani suliarinnittup suliffeqarfiup Kingo Karlsen-ip direktøria Thomas Kingo Karlsen oqarpoq.
Inissiarsuup isuata assaassuarmut uppinnerata nalaani susoqarsimanersoq maanna politiinit paasiniarneqarpoq.
Politiit paasiniaallutik misissuinerat ilutigalugu nunatsini sullivinnik nakkutiliisoqarfik ajutoornermut misissuivoq.
- Suliffeqarfik inissiarsuarmik isaterisoq isaterinermik unitsitsissasoq sullivinnik nakkutilliisoqarfimmit oqaatitsigut peqquneqarpoq, aatsaallu isumannaatsumik sulineq ingerlanneqarsinnaanngorpat aallarteqqissinnaasoq oqarfigineqarneqarluni, nunatsinni sullivinnik nakkutiliisoqarfiup immikkoortortaqarfiani pisortaq Jesper Labansen oqarpoq.
Blok P-usimasup isuata uppinneranut sunarpiaq pissutaanersoq sullivinnik nakkutiliisoqarfimmit qulakkeerlugu paasineqanngilaq.
- Ajutoorneq taamatut ittoq isumannaallisaanermut piumasaqaataasunik maleruaannginermik sullivinnik nakkutiliisoqarfimmit nalilerneqarpoq. Kikkulli ajutoornermut pisuunersut maannangaaq oqaatigissallugu siusippallaarpoq, Jesper Labansen oqarpoq.
- Ajutoornerup nalaani takunnittut arlaqartut maanna politiinit apersorneqarput, soorluttaaq assaassutinik aquttoq apersorneqarumaartoq, vicepolitikommisær Janus Eigaard oqarpoq.
Ajutoornerup nalaani video-mik immiussanik arlaqartunik politiit pissarsipput, taakkualu iluaqutigalugit politiit paasiniaanerminni sulinerat ingerlalluaryoq Janus Eigaard oqarpoq.
Ajutoornermi politiit misissuinerat paasiniaanerallu sapaatip akunnerata tulliani naammassineqarumaartut Janus Eigaard-ip naatsorsuutigaa.
Ajutoornermut kikkut akisussaatinneqassanersut Sullivinnik Nakkutilliisoqarfiup immikkoortortaqarfiani pisortaq Jesper Labansen aperineqarami taanna ima akivoq.
- Ajutoornermi sulisoq sulliffeqarfimmi Kingo Karlsen-imi atorfeqarmat taannartaa isiginiarneruarput, Jesper Labansen oqarpoq.
Ajutoornerup nalaani takunnissimasunik ajutoornermilu takussutissanik uppernarsaatinik politiit suliaqarnertik naammasseriarunikku, suliaq nunatsini Sullivinnik Nakkutilliisoqarfimmut ingerlateqqissagaat, vicepolitikommisær Janus Eigaard oqarpoq.
Tamatuma kingorna eqqartuussivitsigut suliassanngortinneqassanersoq, Sullivinnik Nakkutilliisoqarfiup aalajangiiffigissavaa.
