Kielsen: Malittarisassat atorluuannarpagut
- Tassa uani partiit isumaqatiginninniartut suli isumaqatigiinniaramik suli periarfissamik Siulittaasoqarfimmut qinnuteqarsimavugut. Malittarisassani taanna periarfissaammat, taanna atorluarlugu taamaaliorpugut, Kim Kielsen taama oqarpoq.
Taanna Inatsisartut ukiakkut ataatsimiinnissaata aallartinnissaata tallimanngorpamiit pingasunngorpamut kinguartinnissaanik Inatsisartut siulittaasoqarfiannut sisamanngormat qinnuteqarpoq. Piffissami tassani Demokraatit siulittaasuannik, Niels Thomsenimik naalakkersuisoqatigiinnermut isumaqatigiissuteqarniarnissaminut atussavaa.
Partiinut siulittaasut marluk naalakkersuisoqatigiinnissamut isumaqatigiinniarnerni, maannamut ullunik 18-inik sivisussuseqartumi, piffissamik qanoq atuinerat pillugu isornartorsiorneqareerput.
Piffissami isumaqatigiinniarfissammi Kielsenip aavarnera Thomsenillu najugaqarfimmini Ilulissaniinnerunera tamat oqartussaaqataanerannut ataqqinninnginnerusoq Inuit Ataqatigiit isumaqarput.
AAMMA ATUARUK Isumaqatiginninniarnerit partiit allaffiini pisarput, qaqqamiunngitsoq Ilulissaniunngitsorlu
Isumaqatigiinniarnerilli sukkanerusariaqarnerannik oqalunneq, Kielsenip isumaqatiginngilaa.
- Oqartoqarsinnaanngilaq sivitsulersoq. Periarfissat assigiinngitsut qulaajarneqarput. Tunuliaquttatsinnit qulaajaqqusat assigiinngitsut sammerujoorpagut, KNRimut oqarpoq.
AAMMA ATUARUK Ajornartorsiutitta Kielsen Demokraatillu utaqqisinnaanngilaat