Inuit Ataqatigiit: Isumaqatiginninniarnerit partiit allaffiini pisarput, qaqqamiunngitsoq Ilulissaniunngitsorlu
Inuit Ataqatigiit gruppianni siulittaasup Múte Bourup Egedep tusagassiorfinnut nalunaaruteqarluni erseqqissaatigaa Inatsisartuni sulinerup unitsikkallarneqarnera partiip akuerisinnaanngikkaa.
- Inatsisartut sulinerisa kinguartinneqarnerat akisussaassuseqanngilluinnarnermik takutsineruvoq, inatsisartoqarnerullu ataqqineqannginneranik takutitsinerulluni, Múte Bourup Egede oqarpoq.
Demokraatit Siumullu siulittaasuisa naalakkersuisooqatigiinnik nutaanik pilersitsinissaq pillugu sapaatit akunnerini kingullerni isumaqatigiinniarnerni kukkusumik pingaarnersiuisimanerarpai.
- Naalakkersuisut Siulittaaasuat suleqatissarsiornissaminut piffissaqarluareermat. Kikkummi tamarmik nalunngilaat isumaqatiginninniarnerit partiit allaffiini pisarmata, qaqqamiunngitsoq Ilulissaniunngitsorlu, taama isornartorsiuivoq.
AAMMA ATUARUK Inatsisartut ukiaanerani ataatsimiinnissaat kinguartinneqartoq
Kim Kielsenip isumaqatigiinniarnerit qimallugit Paamiut eqqaannut aavariarsimanera Múte Bourup Egedep innersuussutigaa. Niels Thomsenilu illoqarfigisimanit Ilulissanit Nuummut utikappoq.
Gruppimilu siulittaasup Aningaasaqarnermut Akileraartarnermullu ataatsimiititaliami sisamanngornermi nalunaaqutaq 13.00 ataatsimiinnissaq immikkut eqqaavaa, ataatsimiinnissarmi taanna ataatsimiititaliap siulittaasuata Hermann Berthelsenip noqqaassuteqarneratigut kinguartinneqarmat.
- Partiit allaffeqarfii uiverfiorpaseqalutillu aalassassimaarfioqaat, Múte Borup Egede oqarpoq.
Aningaasaqarnermulli Akileraartarnermullu ataatsimiititaliap ataatsimiinnissaata kinguartinneqarnera naleqquttuusoq, ataatsimiititaliami siulittaasoq Hermann Berthelsen oqarpoq.
- Politikkikkut inissisimanerup aqagu qanoq-innissaa ilisimaneqanngilaq. Ataatsimiititaliat qanoq katitigaasimanersut naluarput, Hermann Berthelsen oqarpoq.
