Tillie Martinussen: Ajornartorsiutitta Kielsen Demokraatillu utaqqisinnaanngilaat

- Innuttaasut susoqalernersoq naluaat, Suleqatigiissitsisuni siulittaasup tullia Tillie Martinussen tusagassiorfinnut nalunaarummi allappoq imalu itisiliilluni.

- Inatsisartoqarneq kinguartinneqarpoq utaqqineqarluni naalakkersuisoqatigiittoqalissanersoq  imaluunniit qinerseqqissanersugut. Tamanna eqqortuusinnaanngilaq.

Suleqatigiissitsisut taamaalillutik Inuit Ataqatigiit isornartorsiuinerat ilalerpaat, Inuit Ataqatigiimmi aamma isumaqarput Inatsisartut ukiaanerani ataatsimiinnissaat, pilersaarutit malillugit tallimanngorpat aallartittussaq, sioqqullugu nutaanik naalakkersuisooqatigiiliornissamut piffissaqarluaraluartoq.

AAMMA ATUARUK Inatsisartut ukiaanerani ataatsimiinnissaat kinguartinneqartoq

Aningaasanut inatsisissap novembarip ulluisa 15-iat nallertinnagu naammassillugu suliarineqarsimanissaa, Inatsisartunullu qinersisoqarnera pissutigalugu nunatta siuttuisa ukioq ataaseq unittooqqasimanerat Tillie Martinussenip erseqqissaatigaa.

- Tassa inuiaqatigiit tamarmik utaqqisussanngorpaat partiit marluk akornanni isumaqatigiittoqarnissaa aamma ataatsimiititaliat sulinerat unitsinneqarnikuuvoq. Ilumoorsinnaanngilaq Inatsisartut, Naalakkersuisunut "sulisitsisuusut" utaqqisinneqassappata,  partiit marluk nunap siulersorneqarnissaa pinnagu allat pingaarnerutinniarmatigit, Tillie Martinussen taama allappoq.

AAMMA ATUARUK Isumaqatiginninniarnerit partiit allaffiini pisarput, qaqqamiunngitsoq Ilulissaniunngitsorlu