Uummannami aalisartut qaleralinniaqqissinnaalersut
Naalakkersuisut ippassaq ataasinngornermi aalajangerput, aqutsiveqarfik Uummannamut qaleralittassiissutit 400 tonsit ukiup naanissaanut aalisarneqartussatut aalisarneqarsinnaalissasut.
Ilassutigineqartunit 267 tonsit umiatsiaararsortunit aalisarneqassapput, 132 tonsit aalisariutinit aalisarneqassallutik.
Aqutsiveqarfik Qeqertarsuup Tunuani umiatsiaaqqamik aalisartutut akuersissutaatillit ukiup sinneranut pisassiissutaasut sinneri 176 tonsit ataasinngornermit aalisarsinnaalerpaat.
AAMMA ATUARUK Nunatta avannaani umiatsiaararsortunut nutaanik akuersissuteqartoqarunnaartoq
Aqutsiveqarfimmut Uummannamut umiatsiaaqqanut 2019-imut qaleralittassiissutigineqartut novembarip 8-anni tamakkerneqarlutik aalisarneqareerput, ullormilu tassani aalisarneq unitsinneqarluni.
Naalakkersuisut aqutsiveqarfimmut Uummannamut 2019-imut qaleralittassat 9.500 tonsinik TAC-ilerpaat, akuerineqarsinnaasumik aalisarneqarsinnaasut. Ilisimatuussutsikkut siunnersuutigineqartut 5.800 tonsiullutik.
AAMMA ATUARUK Kielsenip Siumumi siulittaasuata tulliata Naalakkersuisut isornartorsiorai
Pisassiissutit angallataatilinnut umiatsiaararsortunullu assigiimmik qassutinik aalisarsinnaassanngillat.
Naalakkersuisut aalajangerput pisassiissutit sinneruttut ningittagaannarnik aalisarneqassasut. Aalisarneq pillugu ineriartorneq Naalakkersuisoqarfimmit nakkutigeqqissaarneqassalluni.
