Uuliamik aniatitsineq pillugu killiffik: Mingutsitsineq siaruaatinngikkallarpoq
Kilisaammit kivisumit, Polar Aassimmit uuliakoortoqarnera paasiniarlugu Illersornissaqarfiup Challengeria tallimanngornermi ullaakkut silaannakkut misissuivoq.
Pissutsit maannakkuugallartoq allanngunngitsut, Issittumi Sakkutooqarfimmi pisortaagallartoq, Dan B. Termansen KNR-imut paasissutissiivoq.
- Piffissami matumani nutaamik mingutsitsisoqarneranik takussutissaqanngikkallartoq paasisinnaavarput. Ippassarlu uuliamik dieseliusumik annikitsumik nassaarnitta saniatigut mingutsitsinernik allanik nutaanik aamma takusaqanngilagut.
Kilisaat Polar Aassik ataasinngormat unnukkut ikuallalerpoq. Kilisaallu Qasigiannguit avataani kujammut kimmukanneq 6 sømil missaanik ungasitsigisumi pingasunngornermi kivivoq, tamatumalu kingorna uuliamik mingutsitsineq imaani siaruaappoq.
AAMMA ATUARUK Kilisaat ikuallattoq kivivoq
Issittumi Sakkutooqarfik piffimmi imaanit uuliamillu misissugassanik tigusillattaavoq. Uuliamillu aniatitsisoqarnera siaruaativissanersoq oqaatigissallugu siusippallaarpoq.
- Kilisaatip kivinikup uuliamut tankianit aniasoqarnera kiviffianiittariaqanngilaq, tamanna sumiiffinni allani aamma takkussinnaavoq – immaqa sumiiffimmit sømilinik arlalinnik ungasitsigisumi. Taamaammat susoqarnera nakkutilluarparput, Dan B. Termansen oqarpoq.
Assi: Issittumi Sakkutooqarfik
Illersornissaqarfiulli Polar Aassiup tankiani kivinerata nalaani qanoq uuliaqartiginera qanorlu sinneqartiginera suli ilisimanngilaa.
- Uulia immap qaani takusinnaasatta qanoq sinneqartiginerata nalilernissaanut kilisaammik piginnittumit paasissutissat ilaannik amigaateqarpugut, Dan B. Termansen oqarpoq.
Kaammattuineq: Uuliamik uumasunilluunnit ajoqusersimasunik takusat nalunaarutigineqarlik
Issittumi Sakkutooqarfiup innuttaasut Qeqertarsuup Tunuani sumiiffinniluunniit allani imaani uuliamik imaluunniit uumasunik uuliaqartunik takunnissagunik paasissutissiinissaat kaammattuutigaa.
Nalunaarutiginninneq Issittumi Sakkutooqarfimmut sumiiffimmiluunniit upalungaarsimasunut nalunaaruteqarnikkut pisinnaavoq, ajornanngippallu uppernarsaateqartillugu.
AAMMA ATUARUK Issittumi Sakkutooqarfik aalisartunut: Piffinni allani uuliamik takugussi oqarisi
- Nalunaarutiginnitoqarnerani assimik emailitsinnut nassiussisoqarnissaa kissaatigaarput, taamaalilluta takunninneq qanoq annertutiginersoq takusinnaassagatsigu, Dan B. Termansen oqarpoq.
Issittumi Sakkutooqarfik uumasunik uulia pissutigalugu ajoqusersimasunik toqungasunilluunniit maannamut nalunaarfigineqarsimanngilaq.
- Uumasunik uuliaqartunik suli takunninngilagut. Tamanna pillugu nalunaarfigineqanngilagut aamma nammineq naammattuuinngilagut.
Mingutsitsineq milluarneqarsinnaanngitsoq
Illersornissaqarfiup timmisartua Challenger sumiiffimmi seqernup tallimanngornermi tarrinnginnerani aamma sapaatip akunnerata naanerani qulaavaniarpoq. Tamatuma saniatigut Issittumi Sakkutooqarfik qaammataasatigut piffimmit tassannga assinik pissarsisinnaavoq.
Uuliamillu aniatitsisoqarnerani uuliap milluarneqarsinnaannginnera inunniilluunniit allatut peerneqarsinnaannginnera qulakkeeqqavoq. Tamanna uuliap oqitsuuneranik ilaatigut pissuteqarpoq, taamaammat uulia heavy fueliutulli innarliisinnaatiginngilaq.
Assit: Issittumi Sakkutooqarfik
- Uuliap saattunnguunera pissutigalugu immap qaani annertoorujussuarmik mingutsitsisoqarneratut isikkoqarsinnaavoq. Piffimmi sikunik aserortersimasoqarnera nutaanillu avannaanit sapaatip akunnerata naanerani takkussuuttoqassanera pissutigalugu milluaaniarnissaq akiorniarnissaalu periarfissaanngilaq, Dan B. Termansen oqarpoq.
AAMMA ATUARUK Kilisaammit kivisumit uulia Qasigiannguit eqqaanni 4 kvadratkilometerit sinnerlugit siaruaattoq
Matumani uuliamik aniatitsisoqarnera nunatsinni Caribiamiluunniit pinersoq apeqqutaanngilaq.
- Nunani kujasinnerusuniittuni mingutsitsisoqarnersoq imaluunniit sikoqarfiani pinersoq apeqqutanani akiorniarnissaa periarfissaanngilaq. Taamaammat maannakkut aalarluni nungukkiartorneratulli pisoqarnissaa aaqqiissutissani pitsaanerpaavoq, Issittumi Sakkutooqarfimmi pisortaanerugallartoq oqarpoq.
Mingutsitsisoqarnera qaqugu qaangiutissanersoq suli ilisimaneqanngilaq. Nutaamik aniasoqaqqissanersoq tassunga apeqqutaalluinnarpoq.
Kilisaat kivinikoq Polar Aassik qaqinneqassasoq suli aamma naatsorsorneqarpoq. Tamanna Namminersorlutik Oqartussat suleqatigalugit nalilersorneqartoq, Issittumi Sakkutooqarfiup paasissutissiissutigaa.
