Kilisaammit kivisumit uulia Qasigiannguit eqqaanni 4 kvadratkilometerit sinnerlugit siaruaattoq
Kilisaat Polar Aassik Qasigiannguit avataani ataasinngormat unnukkut ikuallalerpoq. Kilisaat Qasigiannguit avataani kujammut kimmukanneq 6 sømil missaanik ungasitsigisumi kivivoq.
Umiarsuaq alapernaarsuut, Knud Rasmussen Issittumi Sakkutooqarfimmeersoq sumiiffimmi najuuppoq, pisortaanerugallartorlu, Dan B. Termansen naapertorlugu uulia dieseliusoq immap qaani siaruaappoq.
AAMMA ATUARUK Kilisaat ikuallattoq kivivoq
- Timmisartuuterput sumiiffimmik mingutsinneqartumik assiliiartorpoq – mingutsitsiffiusorlu 4 kvadratkilometerinik isorartussuseqarpoq. Uulia kujammut arriitumik ingerlaarpasippoq, Dan B. Termansen oqarpoq.
- Uulia immap qaani aalannguukkiartulerpoq. Sumut ingerlaarnera nakkutigaarput – piffissamilu matumani siaruatsaaliornissaanut piffik annertuallaarpoq. Uulia immap qaani saattunguulluni siaaqqalluni aalannguuppat milluaruminaassaaq, taamaammat qanoq iliornissarput misissuleruttorparput, Dan B. Termansen oqarpoq.
Assi: Issittumi Sakkutooqarfik
Piffiup 4 kvadratkilometerip avataani uuliamik mingutsitsisoqarneranik takusaqartoqanngilaq, taamaattoqalersinnaavorli.
Kilisaammi kivinikuuvoq, taamaammat uulia sumiiffi allani immap qaaniilersinnaavoq.
Kilisaammi uulia dieseliusoq qanoq annertutiginersoq Issittumi Sakkutooqarfiup suliffeqarfik kilisaammik piginnittoq suleqatigalugu paasinialeruttorpaa.
- Suliffeqarfiup uulia qanoq annertutigisoq umiarsuarmiissinnaanera - qanorlu annertutigisup sinnerussinnaanera paasissutissiissutigaa. Taamaalilluta tankimit annertuumik aniasoqarnersoq imaluunniit annikitsuinnaat pineqarnersut nalilersorsinnaavagut.
- Uuliamik dieseliusumik aniasoqarnerussanersoq nalileruminaappoq. Umiarsuaq kivimmat uulianut tankimit aniasoqarnersoq ilisimanngilarput. Kilisaalli kivinngikkallarmat uuliamik aniasoqarneranik takusaqartoqanngilaq. Tankinit aniasoqannginnissaa neriuutigaarput, kisianni suli ilisimanngilarput, Dan B. Termansen oqarpoq.
Assi: Issittumi Sakkutooqarfik
Aalisartullu piffimmut mingutsitsiffiusumukannginnissaat, Issittumi Sakkutooqarfiup kaammattuutigaa.
- Inuit umiatsiaararsortut uuliap siaruatsaaliornissaa pissutigalugu sumiiffimmut qanillattunnginnissaat inassutigaarput, Dan B. Termansen oqarpoq.
Kilisaatip ikuallannerani ajoqusertoqanngilaq.
Kilisaammi inuttat qulit umiarsuarnit allanit qanittumiittunit ikiorneqarlutik umiarsuaq ataasinngormat qimappaat.