Kilisaat ikuallattoq kivivoq

Kilisaat Polar Aassik ataasinngornermi unnukkulli Qasigiannguit avataani ikuallattoq, pingasunngornermi unnukkut kivivoq.

Kalaallit Nunaanni politiit taama paasissutissiipput.

- Kilisaat sukkasuumik kivivoq, immannermigut timitaa ajoqusermat, politiit taama nalunaarput.

Ikuallaffiusoq taassumalu eqqaa qatserisartunit maanna nakkutigineqarpoq, kilisaatillu ikuallalluni kivinerata kingorna  sisamanngornermi ullaakkut nalilersueqqittoqassalluni. 

Uulia immamilluunniit mingutsitsisinnaasut pinngitsoortinniarlugit puttasunik assiaqutsiisoqartariaqarpoq. 

AAMMA ATUARUK Kilisaat suli pujoortoq Qasigiannguit sineriaanit avammut tissukartoq

Issittumi Sakkutooqarfiup sinerissami nakkutilliissutaa Knud Rasmussen kilisaatip ikuallaffianut ingerlaarpoq.

Umiarsuaq pingasunngornermi ualikkut Qasiannguit avataannut tikittussaagaluarpoq sikoqarpallaarneralu pissutigalugu kinguaattoorpoq.

Umiarsuup Knud Rasmussenip qatserisartut ikuallaffiusup eqqani saliginerannik ikiortussaavai.

Issittumi sakkutooqarfiup nalunaarutigaa, timmisartoq alapernaarsuut Challenger ikuallaffiusumukartinneqartoq pissutsit tamaani qanoq innerat takuniarlugu. Taakkua saniatigut sinerissami nakkutilliissut Thetis suliamut ilannguneqarpoq. 

Kilisaat Polar Aassik Trawl Polar Seafood Trawl-mit pigineqarpoq, inuttat qulit  umiarsuaq ataasinngornermi unnukkut qimappaat, angallatinullu allanut ikillutik

AAMMA ATUARUK Kilisaat ikuallattoq ikkarleqqavoq

Kilisaatip ikuallannerani inunnik ajoqusertoqanngilaq ulorianartorsiortoqaranilu.

Kilisaat Aassik Qasigiannguit avataanni ataasinngornermi kilisatsilluni ikuallalerpoq. 

Qatserisartut Qasiannguit avataanni umiarsualivianilu sulineranni Qasigiannguani innutaasut paasinninnerat ataqqinninnerallu politiinnit pingasunngornermi qutsavigineqarput.

Kilisaat Aassik suli ikuallalluni kivisoq Qasigiannguit avataani maanna immap naqqaniippoq