Kilisaat suli pujoortoq Qasigiannguit sineriaanit avammut tissukartoq

- Kilisaat ikkarlimmit kaanngarsimavoq Qasigiannguilli sineriaanit avammut maanna tissukarluni. Pujoorpoq, ikuallattoqarnerali takuneqarsinnaanngilaq. Qatserisartut kilisaammut ikineqarnissaat ulorianarpallaarsorineqarpoq. Qatserisartut taama naliliipput.

Kalaallit Nunaanni Politiit pingasunngornermi unnukkut taama oqarput. Kilisaat ataasinngormalli ikuallalerpoq.

AAMMA ATUARUK Kilisaat ikuallattoq ikkarleqqavoq

- Kalaallit Nunaanni Politiit tamaani oqartussat suleqatigalugit suliami ataqatigiissaarisuupput, politiit nangillutik allapput, suliarlu pillugu kingusinnerpaamik sisamanngornermi paasissutissiiumaarnertik neriorsuutigalugu.

- Qasigiannguani innuttaasut qatserisartut sulisinnaaqqullugit sissamukarnaveersaarnissaannik umiarsuliviliarnaveersaarnissaannillu kaammattuutinik ataqqinninnerat qutsavigaavut, politiit oqarput.

Issittumi Sakkutooqarfik ikiuiartortoq

Kilisaat Aassik kilisaataatilinnit Polar Seafood Trawl A/S-imit pigineqartoq qulinik inuttaqarpoq, kilisaallu ikuallalermat inuttat angallatinut eqqaaniittunut niuneqarput.

Inunnik ajoqusertoqanngilaq, maannalu aamma ulorianartorsiortoqarnani.

Kilisaat Qasigiannguit avataanni ataasinngormat kilisatsilluni ikuallalerpoq.

Qatserisartut Aasianneersut kilisaammut ikuallattumut ataasinngornermi unnukkut anngupput.

Issittumi Sakkutooqarfiup umiarsuaq alapernaarsuut Knud Rasmussen ikiuiartortillugu Qasigiannguanukartippaat. Sikoqarmalli umiarsuaq kinguaattooqqavoq, aqagulu ullaakkut aatsaat tikissinnaanissaa naatsorsuutigineqarluni.