Kilisaat ikuallattoq ikkarleqqavoq

Polar Seafoodip kilisaataataa Polar Aassik Qasigiannguit avataanni ataasinngormat ikuallalersoq suli ikuallappoq.

Tamaani oqartussat suleqatigalugit ikuallanneq qamisarniarneqaleruttortoq, Kalaallit Nunaanni Politiit ilisimatitsissutigaat:

- Kilisaat ikkarleqqavoq, motooriali suli ingerlalluni. Upalungaarsimatitat motoori unitsinniarsaraat, politiit taama allapput, aarlerinartorsiortoqanngitsorli erseqqissaatigalugu.

AAMMA ATUARUK Polar Seafoodip kilisaataataa ullup aappassaa ikuallattoq

Umiarsuaq alapernaarsuut Knud Rasmussen, qamisaaniarnermi ikiuuttussaq, sikoqarnera pissutaalluni kinguaattooqqasoq, Issittumi Sakkutooqarfiup KNR-imut paasissutissiissutigaa.

Umiarsuaq alapernaarsuut kilisaatip nalaanut ullumi apuunnani aqagu ullaakkut nalunaaqutaq arfineq-marlunut qiteqqunnerata missaanni apuutissangatinneqarpoq.

Kilisaat Aassik kilisaataatilinnit Polar Seafood Trawl A/S-imit pigineqartoq qulinik inuttaqarpoq, kilisaallu ikuallalermat inuttat angallatinut eqqaaniittunut niuneqarput. Inunnik ajoqusertoqanngilaq, maannalu aamma ulorianartorsiortoqarnani.

Polar Aassik Qasigiannguit avataanni kilisatsilluni ataasinngormat ikuallalerpoq.

Qatserisartut Aasianneersut kalerrinneqarput, kilisaammullu ikuallattumut ataasinngornermi unnukkut apuullutik.

Ikuallanneq annertuvoq, angallatillu timitaa kissartorujussuanngormat qatserisartut qamisaaniarsimanngillat ulorianarmat.