Polar Seafoodip kilisaataataa ullup aappassaa ikuallattoq
Killisaammi ”Polar Aassik”-mi ikuallanneq ataasinngornermi unnukkut arfineq pingasut qeqqata missaanni nalunaarutigineqarpoq, taamaalinerani kilisaat Qasigiannguit avataaniippoq.
Kilisaat suli ikuallappoq, Kommune Qeqertalimmi qatserisartut pisortaat Niels Ole Hansen KNR-imut taama oqaluttuarpoq.
Kilisaat Qasigiannguit avataanni 4-5 sømilisut avasitsigisumiilluni ikuallalerpoq, kilisannermi nalaani.
Aasianni qatserisartut arfineq marluk kilisaammut ikuallattumut ataasinngornermi unnukkut arfineq pingasut qeqqata qaangernerani apuupput, qatserisartut pisortaat taama oqaluttuarpoq.
Ikuallanneq annertuvoq, angallatillu timitaa kissartorujussuanngormat qatserisartut qamisaaniarsimanngillat ulorianarmat.
Kilisaat Aassik kilisaataatilinnit Polar Seafood Trawl A/S-imit pigineqartoq qulinik inuttaqarpoq, kilisaallu ikuallalermat inuttat angallatinut eqqaaniittunut niuneqarput.
Kilisaatip ikuallalernerani motooria ingerlaannarpoq aamma qalorsuit amuneqaratik Qasigiannguullu tungaanut ingerlaaginnarluni.
Kilisaat annertuumik orsussaqarsimavoq ikuallannerata nalaani taamaattumik qaminniarnissaa ulorianarluni.
Kisianni angallatip motooria unippoq, maannalu qatserisartut kilisaat nakkutigivaat, Niels Ole Hansen taama oqaluttuarpoq.
Politiit kaammattuipput: sissamut qanillinaveersaaritsi
Kalaallit Nunaanni politiini pigaartup pisortaata Malik Olesenip oqarneraa naapertorlugu kilisaat ikuallattoq Qasiannguanit 2 kilometerisut avasitsigisumiippoq.
Qatserisartut akornusersorneqaratik sulisinnaaqqullugit innuttaasut sissamukarnaveersaaqqullugit umiarsualiviliarnaversaaqqullugillu Politiit Qasigiannguani Facebookikkut marlunngornermi unnukkut kaammatuipput.
Issittumi Sakkutooqarfiup sinerissami nakkutilliissutaa Knud Rasmussen killisaammut ikuallattumut maanna ingerlaartoq, qatserisartut pisortaat paasissutissiivoq. Knud Rasmussen pingasunngornermi ualikkut kilisaammut ikuallattumut apuunnissaa naatsorsuutigineqarpoq.
