Issittumi Sakkutooqarfik aalisartunut: Piffinni allani uuliamik takugussi oqarisi

Uulia dieseliusoq saattunnguusoq kilisaatip, Polar Aassiup pingasunngornermi unnukkut kiviffigisaaniittoq immap qaaniippoq.

Uulia piffimmi 6 kvadratkilometerinit tikillugit isorartussusilimmiippoq, sarfarneraniillu anorimillu ingerlaartinneqarluni.

Uuliap saannera serminillu aserortersimasoqarnera pissutigalugit qallornissaa maannakkutut periarfissaanngilaq, Issittumi Sakkutooqarfimmi pisortaanerugallartoq, Dan B. Termansen oqarpoq.

- Uuliali arriitsumik aalannguukkiartulerpoq, ullullu ataatsip ingerlanerani tulliuttumi aalannguukkiartuinnarnissaa nunguinnissaalu naatsorsuutigaarput, pisortaanerugallartoq oqarpoq.

Kilisaat ataasinngornermi unnukkut ikuallalerpoq, Qasigiannguillu avataani kujammut kimmukanneq 6 sømil missaanik ungasitsigisumi ippassaq kivilluni.

Umiarsuaq allamik uuliakoornersoq nalunartoq

Kilisaammi uulia dieseliusoq qanoq annertutiginersoq Issittumi Sakkutooqarfiup Polar Seafood kilisaammik piginnittoq peqatigalugu paasinialeruttorpaa.

Kilisaat immap naqqaniittoq uualiakoornersoq suli nalunarpoq. Taamaammat Issittumi Sakkutooqarfiup piffimmi innuttaasut aalisartullu kilisaatip kiviffiata eqqaaniinngitsumi uuliamik takussagunik nalunaarnissaat kaammattuutigaa.

AAMMA ATUARUK Kilisaammit kivisumit uulia Qasigiannguit eqqaanni 4 kvadratkilometerit sinnerlugit siaruaattoq

- Kilisaatip immap qaaniit kivilluni tammarfiata eqqaani taamaallaat uuliamik takusaqarpugut. Piffinni allani uuliamik takusaqanngilagut, innuttaasulli takusaannik tusagaqarnissarput soqutigilluinnarparput, Dan B. Termansen oqarpoq.

- Tamanna umiarsuarmit uuliakoortoqarnersoq takussutissiisinnaavoq. Uuliakoortoqarnersoq suli ilisimanngilarput. Piffinnili allani uuliamik takunnittoqassagaluarpat uuliakoortoqarsimanissaa ilimagilersinnaavarput, taamaalillutik misissuinerput ingerlateqqissinnaassallugu.

Issittumi Sakkutooqarfiup Namminersorlutik Oqartussallu kilisaat suneqassanersoq aalajangernialeruttorpaat.