Nunatta Isiginnaartitsisarfia oquiartereerpoq: Uteqqilluni iluaqaaq

Nunatta Isiginnaartitsisarfianni sulisut arlallit piffissami sivitsortumi iluaallioreersullu Nuummi Industrivejimi isiginnaartitsisarfiup initaani arlalinni oqoqartoq paasineqarpoq.

Taamaammat illorsuarmi aaqqissuussat tamarmik allamut nuutsinneqartariaqarsimapput, tikeraarlutillu isiginnaartitsiartortut sumiiffinnut allanut nuutsinneqanngikkunik kinguartinneqartariaqarlutik.

Isiginnaartitsisarfimmili sulisut ininut ilisimalluakkaminnut Industrivejimiittunut maanna uteqqissinnaanngorput.

Sanasut illorsuarmik attartortitsisoq suleqatigalugu qaammatini kingullerni nutarterillutillu oquiaapput. Suliarlu taanna angusaqarfiulluarpoq.

Silaannarmimmi misissuinerit kingulliit illorsuarmi tamarmi silaannarmik uuttuineq akuerisaasumik qaffasissuseqartoq takutippaat, tamannalu isiginnaartitsisarfiup pisortaata, Vivi Sørensen nuannaarutigaa.

- Iluaqaaq. Tamatta ataatsimoorsinnaalilernerput qilanaarnarsuaarpoq. Ilinniartuutitsinnut kipiliivippugut. Taavalu isiginnaartitsisarfik anneq una atorsinnaaqqileriarutsigu qilanaarpugut, isiginnaartoqaqqissinnaalernissatsinnut, taanna oqarpoq.

Oquerummat – eqqiaanermut atortut eqqussortut

Nunatta isiginnaartitsiarfia tamakkiisumik suli aallarteqqissinnaanngilaq. Isiginnaartitsisarfimmi torersagassarujussuuvoq, taammaammat isiginnaartitsinissanik pilersaaruteqanngikkallarpoq.

- Tukassuataarpoq. Isiginnaartitsisarfik eqqiaatitserujussuarnikuugatta sorpassuit piiarlugit, tukaqaaq, torersagassaqangaatsiarpoq, kisianni aamma qilanaarpugut, Vivi Sørensen oqarpoq.

Taamaakkaluartorli isiginnaartitsisarfiup initaani ”Black Box”-imi isiginnaartitsisoqassaaq, ini taanna oqummik eqqugaasimanngitsoq, isiginnaartitsisarfiup pisortaa oqarpoq.

- Decembarip aallaqqaataani taavalu decembarip qulingiluaani meeqqanut isiginnaagassiaqarumaarpoq. Inersuaaqqatsinni taanna qujanartumik oqoqarnikuunnginnami, ajunnginnami, taanna oqarpoq.

Tamatuma saniatigut isiginnaartitsisartut KNR-ip ukiortaami aallakaatitassaanut piareersarput, kikkullu tamarmik angerlarsimaffianni isiginnaartitsinerup anersaavanik pilersitsisinnaassallutik neriuutigaat.