Nunatta Isiginnaartitsisarfiata illorsua oqoqalersimasoq

Nunatta Isiginnaartitsisarfiani sulisut sivitsortumik iluaalliortarsimapput. Juunip naaneranilu misissuititsinerup takutippaa Industrivejimi illorsuarmi oqoqartoq.

Nunatta Isiginnaartitsisarfia taama tusagassiorfinnut nalunaarummini allappoq.

Industrivejimi illorsuaq pineqartoq isiginnaartitsisarfiullunilu isiginnaartitsinermik ilinniarfiuvoq.

- Maanna allaffimmik attartorallarpugut Nunattalu Isiginnaartitsinermik Ilinniarfia utaqqiisaasumik sumiiffissamik attartorallarluta illutta misissorneqarnerani; oquk qanoq annertutiginersoq qanorlu iluarsarneqarsinnaanersoq paasinarsissaaq, pisortaq Vivi Sørensen tusagassiorfinnut nalunaarummi taama oqarpoq.

Ukioq manna pilersaarutaasut qujanartumik allanngorujussuanngillat. Homo Sapienne, Niviaq Korneliussenip atuakkiaa malillugu isiginnaagassiaq takuteqqinneqalerpoq, Hanne Trap Friisimit ilitsersorneqarluni. Taanna Nuummi Qassimitakutinneqassaaq nunatsinnilu aamma takutinneqassalluni.

Tikeraarlutilli isiginnaartitsiartortut isiginnaartitsinissaat sumiiffinnut allanut nuunneqanngikkunik kinguartinneqassapput.

Utaqqinissaq pakatsitsissutigaa

Vivi Sørensen, juunip aallaqqaataani Nunatta Isiginnaartitsisarfiani pisortanngoqqammertoq, suliami aallartinnissaanut allannguinissaminullu qilanaarsimasoq maanna utaqqisariaqalerpoq.

- Pakatsivunga pilersaarutikka illumut tunngasut ingerlaannaq piviusunngortissinnaannginnakkit, qujanartumik ukioq manna pisassagut amerlanerit suliarisinnaagatsigit isiginnaartitsisarfeqanngikkaluarluta, taanna oqarpoq nangipporlu:

- Siunissamut neriulluarpunga neriuppungalu illorsuartaarnissatsinnik tapersersorluarneqarumaarluta.

Nunatta Isiginnaartitsisarfiata Industrivejimi illorsuaq attartugarivaat, pilersaarutaavorlu nutaamik illorsuartaartussaaneq. Maanna Katuap siulersuisuisa suliniutaat, tassa Katuamut ilassummik sanaartortoqarnissaa, suli eqqarsaataavoq naak tigussaasumik pilersaaruteqanngikkaluarluni.