USA-p sakkutuui ikiuutissanik tulaassuiffiusartussamik Gazami umiarsualivilioqqusaasut

Amerikamiut sakkutuui Gazap sineriaani umiarsualiviliornissamik USA-p præsidentianit Joe Bidenimit peqquneqarput, ikiuutissat tunniunneqarnissaat qulakkeerneqassammat.

USA-p præsidentiata naalagaaffimmi pissutsit killiffii pillugit ukiumoortumik oqalugiarami tamanna uppernarsarpaa.

Umiarsualiviliortoqarpat, inuussutissat imeq nakorsaatillu assartorneqarsinnaalissapput.

Gazami maanna qaammatini tallimanngortuni sorsuttoqarnerani, palæstiinamiut Gazamiittut inuussutissanik amigaateqartorujussuupput.

Naalagaaffiit Peqatigiit peqqissuunissaq pillugu suleqatigiiffiata WHO-p siusinnerusukkut nalunaruutigaa, Gazap avannarpasinnerusortaani meeqqat arlaqartoq perlerlutik toqusimasut.

USA ikiuutissanik Gazami innuttaasunut timmisartumit nakkaatitsisimasut, Joe Bidenip sapaatit akunnerata siuliani nalunaarutigaa.

USA Gazami umiarsualiviliorpat, Gazami sorsunnermut aatsaat taama qanillitigissaaq.

Amerikamiut atorfilittaannit tusarfiit oqarnerat naapertorlugu Israel USA-p umiarsuliviliorniarneranik ilisimatinneqarpoq.

Umiarsuliviliortoqarpat, isumannaallissaanissamut USA Israelimik suleqateqarniartoq, tusarfik nutaarsíassaqartitsivimmit AFP-mit issuarneqarpoq.

Ikiuutissat tunniunneqarnissaanut USA-mi sakkutuut Naalagaaaffiit Peqatigiit ikiuniaqatigiiffiillu assigiinngitsut suleqatigallugit ataqatigiissarneqassaaq.

Umiarsualivik qaqugu atorneqarsinnaalissanersoq suli ilisimaneqanngilaq.