Sydafrikap Naalagaaffiit Peqatigiit eqqartuussiviat GAZA-mi kaannersuaqarnissaanik pinngitsoortitseqqugaa
Palæstiinamiut Gazamiittut kaannersuaqarneranik eqqorneqariaannaapput, Naalagaafffiillu Peqatigiit inatsisilerinermut tunngasuni qullersaqarfia akuliuttariaqarpoq.
Sydafrika taama isumaqarpoq, Gazamilu kaannersuaqannginnissaa pillugu iliuuseqartoqarnissaa anguniarlugu nunat tamalaat eqqartuussiviannut maanna qinnuteqarluni.
Sydafrikap præsidentiata allattoqarfia taama ilisimatitsivoq. Nutaarsiassaqartitsivik Reuters taama allaaserisaqarpoq.
- Kaannersuaqaleratarsinnaaneranut aarlerinaateqarpoq. Alianartumillu pisoqannginnissaa pillugu eqqartuussivik iliuuseqartariaqarpoq, præsidentip allattoqarfia ilaatigut allappoq.
Ikiorsiissutit Gazamut tunniunneqassasut
Ikiorsiissutissallu Gazamut piaarnerpaamik tunniunneqarsinnaanissaat, Sydafrikap Naalagaaffiit Peqatigiit inatsisilerinermut qullersaqarfianut taassuma saniatigut qinnutigaa.
Palæstiinamiut Gazami atugaat pillugu Danmarkip nunanut allanut tunngasunut ministeriata Lars Løkke Rasmussenip (Moderaterne) aamma ernummatigaa.
Taanna inoqatinut attaveqaqatigiittarfikkut X-ikkut taama allappoq:
- Gazami ikiuiniarneq ajornartoorfiuvoq. Gazamut ikiorsiissutissanik pilersuisoqarsinnaanissaanut Israelip qulakkeerinninnissaa piumasarineqarpoq, Danmarkilu tassani kaammattueqataavoq, Lars Løkke Rasmussen ilaatigut oqarpoq.
- Innuttaasut ikiuiniaqatigiiffinnilu sulisut nunat tamalaat inatsisaat naapertorlugit illersorneqartariaqarput.
EU-mi nunat assigiinngitsut, Sverige siuttoralugu, Israelimut allagaqaateqarput, Gazamut ikiorsiissutissat piaarnerpaamik apuunneqarsinnaanissaat piumasarineqarluni, Danmarkillu kaammattuut taanna atsioqataaffigaa.
Israelip islamisiortullu Hamasimeersut akornanni Gazami qaammatini kingullerni sorsuttoqarnerani nerisassanik imermillu pilersuiniarneq ajornakusooqisoq nalunaarutigineqartarpoq.
Gazap avannarpasissuani meeqqat arlallit perlerlutik toqusut, Naalagaaffiit Peqatigiit peqqissuunissaq pillugu suleqatigiiffiata WHO-p marlunngornermi mianersoqqussutigaa, meeqqallu amerlasuut peqqinnanngitsunik nerisaqartut aamma oqaatigalugu.
