Trumpip naalakkersuisui sisamanngornermi nalunaarput, USA nunatsinni sinniisoqarfeqarlerusuttoq.

Lektori sinniisoqarfittaassaq pillugu: USA nunatsinnut qaninnerusumik attaveqarusuppoq

USA nunarput nammineertunngortinnagu Naalakkersuisunut inuussutissarsiortunullu qaninnerusumik attaveqarusuppoq. taamaaliorneq amerikamiunut kalaallinullu iluaqutaasinaasoq, immikkut ilisimasalik naliliivoq.

Amerikap nunanut allanut tunngasunut ministeriata, Mike Pompeop, nunatsinnut sapaatit akunneranni matumani pingasunngornermi tikeraarnissaralua piviusunngunngitsoorpoq. USA-meersumilli aalajangersimanerusumik siunissami nunatsinniittoqalissaaq.

USA nunatsinni pisortatigoortumik sinniiseqarfeqarusuttoq, Trumpip naalakkersuisui sisamanngornermi nalunaarput, USA-llu naalagaaffiata nunatsinnut attaveqarnerani kapitali nutaaq taamaalilluni aallartippoq.

 

AAMMA ATUARUK USA nunatsinni sinniisoqarfittaarniarpoq

Jon Rahbek-Clemmensen, Illersornissaq pillugu Københavnimi ilisimatusarfimmi sakkutooqarneq pillugu ilisimatusaatini lektoriusoq, taama naliliivoq.

Amerikamiut nunatsinniisitsisarnerat

1940-miit 1953-mut: USA Nuummi konsuleqarfeqarput, sorsunnersuaq kingullermi ammartumik. Amerikamiorpassuit sorsunnersuup kingulliup nalaani nunatsinniipput.

1941: Qallunaq qaffasissumik atorfilik, Henrik Kaufmann, USA-lu illersornissaq pillugu isumaqatigiisuteqarput. USA isumaqatigiissuteqarnikkut nunatsinni sakkutooqarsinnaalerpoq, ilaatigut Pituffimmi.

2007: Naalakkersuisut Amerikamiullu naalakkersuisui Bush-ip siuttuuffigisai konsuleqalernissamik oqaloqatigiilerput.

2019: USA-p naalakkerrsuisui Trump-ip siutuuffigisai nunatsinni pisortatigoortumik sinniisoqarfeqalerumallutik nalunaarput.

- Kalaallit Nunaat namminersuleriartuinnarnermut ingerlasuuvoq  nunaallunilu Amerikamiut soqutigisaqarfigisaat, taanna oqarpoq.

- Taamaammat naatsorsuutigaara, USA-p taama ineriartorneq sunniuteqarfigerusukkaa kalaallillu naalakkersuisuinut pitsaasumik attaveqarnissaq qulakkeerusullugu.

 

Nuuk Washingtonilu imminnut qaninnerulersut

Namminersorlutik Oqartussat qallunaat aallartitaqarfianni USA-p illoqarfiisa pingaarnersaanni, Washington D.C-miittumi maanna sinniisoqarfeqarput.

Tamanna nunatta suliassaqarfinni akisussaaffigileriikkamini nunanik allanik qanoq suleqateqassanerluni aalajangersinnaaneranik pissuteqarpoq. Danmarkilli Kunngeqarfiup tamarmiusup illersornissamut sillimaniarnermullu politikkia akisussaaffigaa.

Amerikamiut nunatsinni sinniisoqalerfeqalerpata naalakkersuinikkut oqaloqatigiinneq niueqatigiinnerlu assigiinngitsorpassuartigut pisariinnerulissasoq, Jon Rahbek-Clemmensen oqarpoq.

AAMMA ATUARUK Pompeop tikeraarnissaa taamaatinneqarani kinguartinneqarpoq

- Suliassaqarfinni Københavnimiit akuliuffigineqartariaqanngitsuni. Taamaammat peqqinnissaq pillugu, ilinniartitaaneq pillugu inuussutissarsiortullu akornanni suleqatigiinneq pilersikkuminarnerulissaaq Amerikamiunullu nunatsinni aningaasaliinissaq ajornannginnerulerluni, taanna oqarpoq.

Tamatuma saniatigut USA aamma Kinap nunatsinnut soqutiginninnera ernumanartippaa.

Naallu Danmarkip sillimaniarneq akisussaaffigigaluaraa, Amerikamiut nunatsinni allaffeqalernerat USA-mut qaninnerusumik attaveqalernermik immaqalu Kinamut ungasinnerunermik kinguneqarsinnaasoq, Jon Rahbek-Clemmensen naliliivoq.

Amerikamiut 1940-kkunni sinniisoqarnerannit allaanerussaqisoq

Amerika nunatsinni aatsaat sinniisoqarnialinngilaq.

Amerikamiut Nuummi 1940 konsuleqarfimmik ammapput, Amerikamiut sakkutuui taamani nunatsinniimmata, Danmark nazistinit tiguagaaqqasoq. Konsuleqarfik 1953-imi, nunarput Danmarkimi allatulli amtinngormat, matuvoq.

Amerikamiulli nunatsinni maanna sinniisoqarfissaat allaanerujussuarmik atuuffeqassasoq, Jon Rahbek-Clemmensen oqarpoq.

AAMMA ATUARUK USA vil åbne et konsulat

- Amerikamiut sorsunnersuup nalaani nunatsinniititarpassuaqarput. Ullumikkulli taamaaqqajassanngilaq, taanna oqarpoq.

- Assigiinngissut tunngaviliisoq tassaavoq, Kalallit Nunaanni namminersorneq maanna eqqunneqarsimalermat, namminersornerlu pillugu inatsit 2009-meersoq atorlugu Amerikamiut sinniisoqarfeqalerniarput, kalaallinik oqaloqatiginnittussamik. 1940-ikkunni 1950-ikkunnilu suut tamarmik Danmarkimi aalajangerneqartarput.

Taamani nunanut allanut tunngasunut naalakkersuisuusoq, Aleqa Hammond, aamma 2007-imi nalunaarpoq, Amerikamiut sinniisoqarfeqalernissaat nunatta oqaloqatiginnissutigigaa. Tamannali piviusunngunngilaq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat