Pompeop tikeraarnissaa taamaatinneqarani kinguartinneqarpoq

Amerikamiut nunanut allanut tunngasunut ministeriata tikeraarnissaa taamaatiinnarneqanngilaq - piffissaali aalajangernagu kinguartinneqarpoq. 

Mike Pompeop nunatsinnut aqagu tikeraarniarunnaarnerata nalunaarutigineqareersoq Naalakkersuisut taama ilisimatitsipput. 

Mike Pompep Kangerlussuarmut sisamanngorpat ullaakkut tikinnissaa pilersaarutaagaluarpoq. Nunanut allanut tunngasunut naalakkersuisup Ane Lone Baggerip danskillu nunanut allanut tunngasunut ministeriata Anders Samuelsenip tikilluaqqusussaagaluarpaat.

Pompeo Kangerlussuarmit Nuummut ingerlaqqittussaagaluarpoq, tassanilu Naalakkersuisut siulittaasuannit Kim Kielsenimit tikilluaqquneqarluni. Tamatumalu kingorna Pompeo, Samuelsen Baggerilu ataatsimeeqatigiittussaagaluarput  tusagassiortunillu kingorna katersortitsillutik.

Pompeo sulisunilu marlunngormat Berlinimut ullumikkullu Londonimut aamma tikeraartussaagaluarput. Tysklandimi kanslerip Merkelip Berlinimi ataatsimeeqatiginissaa taamaatiinnarneqarpoq amerikamiullu aallartitaat taarsiullugulu Irakiliarput. 

Naalakkersuisoqarfillu naapertorlugu Pompeo qaqugu tikeraassanersoq ilisimaneqanngilaq. Aamma kinguartitsisoqarneranut suna pissutaanersoq ilisimaneqanngilaq - "Sulialli nukinginnarluinnartut pillugit nunanut allanut ministeri Washingtonimiittariaqarmat tikeraarnissaq kinguartinneqartoq", ilisimatitsissutigineqarpoq.