USA nunatsinni sinniisoqarfittaarniarpoq

USA ukiorpassuarni nunatsinni sinniisoqanngereerluni maanna sinniisoqarnialerpoq. Amerikap naalakkersuisuisa oqaaseqartartuisa ilaat taama ilisimatitsivoq.
Assi © : NATO North Atlantic Treaty Organization/Flickr Creative Commons
Allattoq Mette Nørmark, Bikki P. Kleist
maajip 09-at 2019 07:58

USA-p nunanut allanut tunngasunut ministeria Mike Pompeo nunatsinnut ullumi tikeraartussaagaluarpoq. 

Washingtonimili pisariaqartinneqarami ippassaq taamaatitsiinnarpoq. 

Pompeoli nutaarsiassavissuarmik nunatsinnut nassataqaraluartoq, oqaaseqartartoq KNR-imut allappoq.

Taassumami oqarnera naapertorlugu USA nunatsinni aalajangersimasumik sinniisoqarfeqalerniarpoq:

- USA ukiut 60-it sinniisoqanngereerluni naalagaaffiup aalajangersimasumik sinniisoqarnissaanik siunniussaqartoq, ministerip Pompeop nalunaarutigissallugu qilanaaraa. Tamanna angujumallugu USA-mi inatsisartut Danmarkilu suleqatigalugit sukkasuumik pivisunngortinniassavarput, oqaaseqartartoq Morgan Ortagus allappoq.

Nunat pingasut oqaloqatigiinnerat, Qallunaaat nunanut allanut tunngasunut ministereqarfiata Ritzauimut uppernarsarpaa.

- USA-p Kalaallit Nunaanni najuunnerata nukittorsarnissaaa pillugu USAp, Danmarkip KAlaallit Nunaatalu oqaloqatigiinnerat, nunanut allanut tunngasunut ministereqarfiup uppernarsarsinnaavaa, tassanngaanniit allapput. 

Mike Pompeop kingusinnerusukkut tikeraarnissaa pilersaarutaavoq.
 

 

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk