Illoqarfinnut nutserneq qangaaniilli pilerpoq unitsitassaanngingajavillunilu
Taamatullu ineriartortoqarnera unitsitassaanngingajavippoq. Nuna tamakkerlugu pilersaarusiamut nassuiaammut nutaamut missingiummi, maanna tusarniaassutigineqartumi, ilaatigut tamanna atuarneqarsinnaavoq.
Nunaqarfinnit illoqarfinnut anginerusunut 1938-mili nutsertoqalerpoq. Nuna tamakkerlugu pilersaarusiamut nassuiaammi kisitsisit naatsorsuinerillu taama ersersitsipput.
- Ukiuni taakkunani 80-ini nutsertoqarnera ingerlaavartumik pisimavoq, suliniummi aqutsisoq nunalu tamakkerlugu pilersaarusiamut nassuiaammut akisussaasuusoq, Klaus Georg Hansen, taama oqarpoq.
1938-mi inoqarfiit agguaqatigiissillugu tamarmik immikkut 100-nik najugaqarfigineqarput, ukioq mannalu nunatsinni inoqarfiit tamarmik immikkut agguaqatigiissillugu 750-inik innuttaqarlutik.
AAMMA ATUARUK Nunaqarfiit pillugit ammasumik pilersaarusiortariaqarpugut
- Inoqarfiit agguaqatigiissillugu inuttussutsimikkut malunnaateqangaatsiartumik amerleriarsimapput, aamma ukiut 80-it ingerlanerini amerliartuinnarsimapput, Klaus Georg Hansen taama oqarpoq.
Assersuutigalugu 50-ikkunni nutarsaaneq, G-60 imaluunniit assigiimmik akeqartitsinerup atorunnaarsinneqarnera nunaqarfinnit illoqarfinnut nutsertoqarneranut siornatigut nalinginnaasumik pissutaatinneqartaraluarput.
- Kisitsisilli 30-kkunneersut qimerloorutsigit, taava innuttaasut taamanili eqiteriartulereersimasut takusinnaavarput, Klaus Georg Hansen oqarpoq.
Ineriartornerlu taanna, illoqarfinnut nutserneq, nassuaammi inerniliussat naapertorlugit unitsitassaanngingajavippoq.
- Kalaallit Nunaanniinnaq illoqarfinnut nutsertoqanngilaq, nunarsuaq tamakkerlugu pissutsit taamaapput. Nunarsuarmi tamarmi taamaattoqartillugu qangalilu aallartissimareertillugu, taava maannakkorpiaq allanngornissaa naatsorsuutigineqarsinnaanngilaq, Klaus Georg Hansen oqarpoq.
AAMMA ATUARUK Nunaqarfiit ilaasa salliutinneqartarneri nutaarsiassaanngilaq
Assersuutigalugu Norgemi isorliunerusut inuerukkiartornerat unitsinniarlugu aningaasat milliarderpassuit atorneqarsimapput, taamaakkaluartorli illoqarfinnut nutserneq Norgemi atuuttuarsinnarpoq.
- Inuit inoqarfinnit mikisunit inoqarfinnut anginerusunut nutsernerisa allanngortinniarnissaata qanoq ajornartigineranut tamanna takussutissaavoq, Klaus Georg Hansen taama oqarpoq.
Nuna tamakkerlugu pilersaarusiamut nassuiaat oktobarip 31-ata tungaanut tusarniaassutigineqarpoq, Inatsisartullu ukiaanerani ataatsimiinnerisa nalaani ilaasortanut agguaanneqarnissaa naatsorsuutigineqarluni.
AAMMA ATUARUK Nunaqarfiit ilai inuerukkiartorumaarput