Upernaviup eqqaani nunaqarfinni tunisassiorfiit sulisussanik amigaateqarfiunngitsut
![](/sites/default/files/styles/image_934x467/public/fiskefabrik_hellefisk_innaarsuit_rg.png?itok=jt7Xjp2P)
Piginneqatigiiffiummi Arctic Fish Greenland A/S-ip, aalisartunit 96-init aamma sulisunit qulinit ilaatigut piginneqatigiiffigineqartup, Kullorsuarmi aamma Nuussuarmi tunitsivii, sulisussaaleqingaarnatik tunisassiorput.
Taama suliffeqarfissuaq Royal Greenland, Arctic Fish Greenland A/S-imi 70 procentimik piginneqaataasoq nittartakkamini allappoq.
Royal Greenland naapertorlugu nunaqarfinni taakkunani marlunni tunisassiorneq ima ingerlalluartigivoq allaat containerinik qerititsivilersuineq malinnaarpiarsinnaanani.
AAMMA ATUARUK Fabrikken i Saattut lukkes i tre måneder
Kullorsuarmi tunitsivik Arctic Fish Greenland A/S-imit siorna ingerlanneqalersoq ukioq manna containerinik qerititsivinnik qulinik pilerneqarpoq. Tunisassiornerli ima ingerlalluartigivoq tunitsivik ulluni makkunani containerinik qerititsivinnik sisamanik allanik aamma pilerneqaqqilluni.
- Uanga nammineq aalajangiisinnaasuuguma ilaqqikkusussinnaagaluarpakka, kisianni aamma nunaminertatut periarfissaasinnaasoq amigalerami, taamaammat susinnaanerluta takujumaarparput, Frederik Olsen Kullorsuarmi Nuussuarmilu tunitsivinni ulluinnarni aqutsisuusoq, Royal Greenlandip nittartagaanut taama oqarpoq, imalu nangilluni:
- Ukioq aalisartut pissaannik qamuteralannik katillugit 18-inik Nuussuarmut Kullorsuarmullu pilersuivugut, tamatumalu kingorna aalisartut qaleralippassuarnik tulaassuiuarsinnarput, tunisassiornerlu marloriaatinngorluni. Taamalu qaammatit tallimat ingerlaneranni Kullorsuarmi Nuussuarmilu 700 tonsit qeritippagut.
AAMMA ATUARUK Aasaanerani sulisussaaleqisoqarmat sulisut sulipiloorput
Arctic Fish Greenland A/S Nuussuarmi tunitsivimmini sulisunik unnukkoortussanik ilaanni amigaateqartaraluarluni Nuussuarmi tunisassiorneq aamma kissaatigineqartutut ingerlalluartoq Upernaviup nunaqarfiini taakkunani marlunni tunitsivinni ulluinnarni aqutsisuusoq oqarpoq.
Nuussuarmi aamma Kullorsuarmi tunitsiviit tamarmik immikkut qulit tungaanut sulisoqartarput, tamarmik nunarfinnit taakkunaneersuusut.