Saattuni tunitsivik qaammatini pingasuni matoqqatinneqalersoq

Tamanna tunisassiorfimmi qerinasuartitsiveqafissamik sanaartornialernermik pissuteqarpoq, Royal Greenland nittartakkamini allappoq.  

Tunisassiorfimmi qerinasuartitsiveqalerpat tunisassiarineqartut amerlanerungaatsialissapput.

- Nutarterinerup kingunerisaanik pingasoriaammik tunisassiortoqarsinnaalissaaq, taamalu ulloq unnuarlu 15 tonsit missaannik tunisassiortoqarsinnaalissalluni, maannamut 5 tonsit missaannik tunisassiortoqartarluni, qalerallerinermi ingerlatsisoq, Niels Ole Møller oqarpoq.

Saattuni tunitsissarfiup qerinasuartitsiviata allinerneqarnera Royal Greenlandip Nuugaatsiami tunitsivimmik annaasaqarneranut taartaassaaq. Nuugaatsiami tunitsivik siorna juunimi tassaarsuarnerani illuutini annaasaanut ilavoq.

Inissanik sanaartortoqassaaq

Saattuni tunisassiorfimmi sulisussaaleqisoqartarmat sulisunut arfineq-pingasunut aamma inissialiortoqassaaq.

Sulisunut inissiat nutaat sulisunut tikisitanut atorneqarnissaat eqqarsaataavoq.

- Sulisorisavut angutit aalisarsinnaanermut allagartartaarlutik aalisartunngormata ajoraluartumik sulisorisatut annaavagut. Sulisuvullu aalajaatsut ukioqqortusisut inuusunnernik taarserneqarneq ajormata allatuulli sulisussaaleqiffiusuni avataaneersunik sulisussarsiortariaqarpugut, qalerallerinermi ingerlatsisoq, Niels Ole Møller oqarpoq.

Saattuni tunitsivimmi sulisut tunitsiviup nutarternerata nalaani Uummannami tunitsivimmi sulisinnaannut neqeroorfigineqarput.