Royal Greenland: Aasaanerani sulisussaaleqisoqarmat sulisut sulipiloorput

Tunisassiorfik sulisussarsiormat Kinamit, Skandinaviamit tunumiillu sulisussarsiorneq iluatsippoq. Taakkuli naammanngimmata sulisut sulipiloortut tunisassiorfimmi ingerlatsisoq, Kirsten Kristensen Worm Royal Greenlandip nittartagaani oqarpoq.

- Naak ulloq unnullu tunisassioraluarluta tamakkiisumik tunisassiussagutta sulisunik amerlanerusunik suli amigaateqarnerput pissutigalugu sulisuvut aalajaatsut qaangiuttoorlutik sulisariaqartaramik artukkerneqarput. Tamanna timaasa malugaat qasulluinnarpullu, Uummannami tunisassiorfimmi ingerlatsisoq, Kirsten Kristensen Worm oqarpoq.

Nunaqarfinni Saattuni Ikerasammilu sulisussat amigaataanerat pissutigalugu tunisassat Uummannamut assartorneqartarput, tamannalu Uummannani tunisassiorfimmi unammillernartut ilagaat.

AAMMA ATUARUK Royal Greenland Tunumeersunik sulisussarsisoq

Maniitsumi Upernavimmilu tunisassiorfinni aamma sulisussaaleqisoqarpoq, Qasigiannguani, Ilulissani Qeqertanilu aamma sulisussaaleqisoqarpoq. Uanili sulilersut soraaqqipallattarnerat ajornartorsiutaasunut ilaavoq.

- Suliffissarsiuussisarfik Majoriaq aqqutigalugu sulisussarsioratta pissarsigaluarluta suli amigaateqarpugut, naak suliartorlutik takkuttartut arlaqartaraluartut ajoraluartumik arlallit takkuteriarlutik takkuteqqinneq ajorput, Qasigiannguani tunisassiorfiup ingerlatsisua, Hans Grønvold oqarpoq.

Qeqertarsuarmi, Kangaatsiami, Sisimiuni, Nuummi Paamiunilu tunisassiorfiit maannakkut sulisussaaleqinngillat, sulisulli ataavartumik sulisinnaasut amigaataasartut, Nuummi tunisassiorfimmi ingerlatsisoq, Ilannguaq Abrahamsen oqarpoq.

- Maannakkorpiaq sulisunik amigaateqanngilagut suliartortut nutaat amerlammata, kisiannili ullut tamaasa ataavartumik sulisinnaasunik amigaateqarpugut, Ilannguaq Abrahamsen oqarpoq.

AAMMA ATUARUK Akissarsiatigut pitsanngorsaaneq sulisunut aalaakkaanerulersitsissaaq