SIK: Akissarsiatigut pitsanngorsaaneq sulisunut aalaakkaanerulersitsissaaq

Akissarsiatigullu pitsanngorsaanikkut tamanna aaqqivigineratigut sulisut sulerusussuseqalissasut Sulisartut kattuffianni SIK-mi siulittaasoq Jess G. Berthelsen oqarpoq.

- Tassunga killissimavugut taavalu tassa arlaatigut pinngitsoorata iliuuseqartariaqarpugut aaqqiiviginiarlugu, Jess G. Berthelsen oqarpoq.

Kommuneqarfik Sermersuumi utoqqaat illuini sulisut ilaasa sulinngitsuukulaneri ajornartorsiutaavoq. Taamaammat sulisunut suliartortuaannartunut akissarsiat qaavisigut 1.000 koruuninik oktobarip aallaqqaataanit atuutilersumik tapeqartinneqalerput.

AAMMA ATUARUK Mød på arbejde hver dag og få kontant bonus

Aamma sulisut qaammammut ullunik marlunnik ikinnerusunilluunniit napparsimaffeqarsimasut akunnermut 2 koruuninik tapisiaqartassapput.

Taama aaqqiinikkut sulisut sulinngikulajunnaarnissaat siunertaavoq.

- Neriuutigisarput uaniippoq taamatut aaqqiinertigut sulisut aalaakkaanerulernissaat.

Aaqqissuussineq iluaqutaanersoq ukiup affaa qaangiuppat nalilersuiffigineqassaaq. Taamaattoqarsimappallu suliffeqarfinni allani aamma taama aaqqissuusisoqarsinnaanera misissorneqassalluni.

- Taannalu misiliutiginiarparput. Iluatsissagutsigulu taava allani aamma misiliissaagut taamatut aaqqiilluta, meeqqerivinni ilaalu ilanngullugit, Jess G. Berthelsen  oqarpoq.

AAMMA ATUARUK Bonusisiaqartitsineq Ippiarsummi nuannaarutigineqarpoq