Unnuk kultuurisiorfik soqutigineqarluarpoq

Arfininngornermi januaarip 27-ani unnuk kultuurisiorfik sinerissami illoqarfinni qulingiluani ingerlanneqartussap soqutigineqarnera annertusiartorpoq.

Ilaqutariit ataatsimuualaarlutik akeqanngitsumik sammisassaqarsinnaanerat pissarsiaqarfiulluartartoq, Nuna tamakkerlugu unnuk kultuurisiorfinnik ataqatigiissaarisuni siuttuusoq Elisa Jeremiassen unnersiorpoq.

2001-mili Unnuk kulturisiorfik aallartissimavarput, taavalu Nunatta Atuagaateqarfiani immitsinnut kaammattoqatigeeriarluta sinerissamut siammariartuaartissimavarput, Elisa Jeremiassen oqarpoq.

Unnuk kultuurisiorfik ilaqutariinnit tamanit pissarsiaqaataasarpoq.

- Ilaqutariinnit pissarsiaqaataalluartarpoq, eqqissillutik akeqanngutsumik ornitassaqarsinnaanerat, inunnillu nuannisarlutik naapittaqattaagaqarlutik, taavalu aliikkusersorneqarlutik, qaammarsarneqarlutik imaluunnit oqalugiarfigineqarlutik pissarsiaqaatigisarpaat, Elisa Jerimiassen oqarpoq.

Suliffeqarfiit, eqqumiitsuliortut, isiginnaartitsisartut, peqatigiiffiit, assassortartut, suliniaqatigiiffiillu unnuk kultuurisiorfimmi peqataasarput.

- Kikkulluunniit unnummut tassunga peqataanissaminnut periarfissaqarput, apeqqutaanginnarpoq piumassuseqarnersut, Elisa Jerimiassen oqarpoq.

- Peqataanikut uerisarput, aamma uagut uerisarpugut, aappaaniunissamut piareersalereertarpugut, qanoq allannguuteqartitsilluta unnuk kultuurisiorfimmi peqataassanerluta, Elisa Jerimiassen oqarpoq.

Uummannaq, Ilulissat, Qasigiannguit, Aasiaat, Sisimiut, Nuuk, Narsaq, Qaqortoq Illoqqortoormiullu Unnuk kultuurisiortitsissapput.

Unnuk Kultuurisiorfik pillugu paasisaqarnerorusuttunut internettimi nittartagaq www. Kulturnat.gl takuneqarsinnaavoq.