Nunarput Barcelonatut Balitullu iliortoq: Unnuinermut akitsuuteqartitsilerniartoq

Nunatsinni angalasut unnuinermut ataatsimut 20 koruunimik saniatigut akiliisalersinnaapput.

Tamanna inatsisissatut siunnersuummi nutaami naalakkersuisut tusarniaassutigileruttugaanni allassimavoq.

Inatsisissatut siunnersuut naapertorlugu akitsuut takornarianut aamma nunatsinni najugalinnut nunatsinni angalasunut atuutissaaq, akitsuullu akunnittarfinni, unnuisarfinni aamma ineeqqani attartukkani illuaqqaniluunniit unnuinermut akiliutaasassalluni.

Unnuisarfiilli 25-nit ikinnerusunik imaluunniit qaammatinut pingasunut ikinnerusunik unnuiffigineqartartut ilaatinneqanngillat. Aamma inuit 18-it inorlugit ukiullit akitsuummik akiliuteqarnissamut ilaatinneqanngillat.

Akitsuut 6,8 millionit koruuninik iluanaarutaassangatinneqarpoq, isertitallu nunatsinni kommuninut tallimanut ilaatigut agguaanneqassapput, sumiiffinnilu nunallu immikkoortuini takornariaqarnermut neqeroorutinik ineriartortitsinermut atorneqassallutik.

Inatsisissatut siunnersuut ukiakkut ataatsimiinnermi akuerineqassaguni 2026-mi januaarip aallaqqaataanit atuutilissaaq.

Nunani allani atugaasut

Unnuinermut akitsuuteqartitsinermut – imaluunniit takornarianut akileraarummut – isumassarsiaq nutaajunngilaq.

Nunarpassuit allat illoqarfissuillu takornarianut tikeraartunut ullumikkut akitsuuteqartitsisareerput. Assersuutigalugit takoriarifigineqarluartartut Grækerit Nunaat, Venedig, Bali aamma Berlin.

Spaniami sumiiffinni arlalinni takornarianut imaluunniit unnuinermut akitsuutit aamma atuutilersinneqarnikuupput. Spaniami illoqarfissuarmi Barcelonami takornarianut akileraarut illoqarfiup pisortaatitaanit 2021-mi atuutilersinneqarpoq, taamaammat unnuinermut ataatsimut ullumikkut 3,25 euromik (25 koruunit missaannik) ullumikkut akiliisoqartarpoq.

Københavnimi isumassarsiaq taanna qanittumi qaqinneqarnikuuvoq. Takornarianut akileraarutip atuutilersinneqarnissaanut periarfissat misissorneqassasut Københavnip Rådhusiani amerlanerussuteqartut 2023-mi decembarimi aalajangerpaat.

DR-ili naapertorlugu isumassarsiaq taanna inuussutissarsiornermut ministerimit, Morten Bødskovimit (A) erngertumik unitsinneqarpoq.

- Takornarianut pilerisaariniarnermi unammillerneq sakkortungaatsiarpoq, akitsuullu takornarianik Københavnimut Danmarkillu sinneranut tikisitsiniarnissamut periarfissalunnerulersitsissaaq. Muminganillu ingerlaniartussaavugut, taanna taamani DR-imut oqarpoq.

Umiarsuarnut takornariartaatinut akitsuummut nutaamut assingusoq

Unnuinermut akitsuut naalakkersuisut nunatsinni atuutilersinniagaat umiarsuarmik takornariartaammik angalasunut akitsuummut nutaamut ukiup nikinnerani atuutilersumut assigiinngitsorpassuartigut assinguvoq.

Malittarisassat nutaat naapertorlugit umiarsuarsuit takornariartaatit nunatsinni umiarsualiit 19-it ilaannut kisarnerit talinnerillu tamarmik ilaasumut ataatsimut 50 koruunimik akiliiffigisassavaat.

Tamatuma saniatigut avatangiisinut aserfallatsaaliuniarnermullu akitsuummik ilaasumut ataatsimut 50 koruunimik akiisitsisoqarnissaanut periarfissaqarpoq. Aningaasat taakku kommunit umiarsuavinni atortunut soorlu talittarfinni ikaartarfinnut aamma perusuersartarfinnut aningaasaliissutigissavaat.

Umiarsuarmik takornariartut allallit saniatigut akitsuummut akiliisinnaalluarlutik KNR-imut oqaatigaat.

Unnuinermut akitsuut nutaaq pillugu inatsisissatut siunnersuut juulip aqqaneq-aappaata tungaanut tamanut tusarniaassutigineqarpoq.