Angut tarnikkut napparsimasoq pinngitsaaliilluni atornerluisimasutut toqutseriarsimasutullu eqqartuunneqartoq
Eqqartuussisoqarfik Kujallermi suliaq siorna apriilimeersoq ullumikkut naammassineqarallarpoq.
Suliaq angummut 24-nik ukiulimmut, arnamik inuusuttumik Qaqortumi najukkami siorna apriilip 17-ianni pinngitsaaleeriartumut aamma toqutseriartumut tunngassuteqarpoq.
Kalaallit Nunaanni Politiit tusagassiuutinut nalunaarummi allapput.
Angutip tamanna iluatsinngilaa, angullu siornali tigummigallarneqarluni Danmarkimi tarnikkut napparsimasunut napparsimmavimmiilerpoq.
Tarnikkut napparsimasunut uninngasussanngortinneqartoq
Angut tarnikkut napparsimasunut napparsimmavimmut uteqqissaaq, angummi tarnikkut nappaateqarpoq, taamaammat eqqartuussisoqarfiup angut nalinginnaasumik pineqaatissinneqarnissamut naleqqutinngissoraa, politiit tusagassiuutinut nalunaarummi allapput.
- Angutip 24-nik ukiullip pinngitsaaleeriartutut toqutseriarsimasutullu eqqartuunneqarnera saniatigullu unnerluussisussaatitaasut immikkut ittumik pineqaatissiisoqarnissaanik piumasaqaateqarnerata malinneqarnera naammagisimaarpara, suliami unnerluussisussaatitaasoq, Line Pedersen tusagassiuutinut nalunaarummi oqarpoq.
24-nik ukiullip eqqartuussut akueraa, unnerluussisussaatitaasullu suliareqqitassanngortitsiniarnermut apeqqut isumaliutiginiarlugu.
- Unnerluussisussaatitaasut nakorsanik oqaaseqaatit tunngavigalugit danskit tarnikkut napparsimasunut napparsimmavimmiittussanngortitsisoqarnissaa piumasaraat. Eqqartuussisoqarfiulli immikkut ittumik pineqaatissiinissamit sakkukinnerusumik – tassa danskit tarnikkut napparsimasunut napparsimmavianni katsorsarneqartussanngortitsinissamik pineqaatissippaa. Unnerluussisussaatitaasut Københavnimi Naalagaaffiup eqqartuussisua suleqatigalugu suliareqqitassanngortitsinissamut apeqqut isumaliutersuutiginiarpaat, Line Pedersen oqarpoq.
Naak Eqqartuussisoqarfik Kujalleq suliamik suliarinnittuugaluartoq unnerluutigineqartoq eqqartuussivimmi suliap suliarineqarnerani Eqqartuussisoqarfik Kujallermiissinnaannginnera pissutigalugu Nuummiittoq, unnerluussisussaatitaasup pingasunngornermi sisamanngornermilu eqqartuussisoqarnissaa sioqqullugu KNR-imut paasissutissiivoq.
