Angut 24-nik ukiulik toqutseriarsimasutut pinngitsaaleeriarsimasutullu eqqartuussaalersoq
Arnaq Qaqortumi ukioq kingulleq apriilip 17-ianni ullaaralaakkut pinngitsaalillugu atoqatigeriarneqaraluarpoq toqoriarneqaraluarlunilu.
Pinerliisoq Eqqartuussisoqarfik Sermersuumi ullumi aqagulu eqqartuunneqassaaq, pisuutinneqassagunilu killiligaanngitsumik pineqaatissinneqarsinnaassalluni.
Unnerluussisuutitaasummi tarnikkut nappaatillit napparsimaviannut Danmarkimiittumut kililigaanngitsumik inissiinissartik piumasaqaatigaat.
'Nipaatsumik toqorusuppit anniarlutilluunniit?'
Unnerluussissummi allaqqasut naapertorlugit, angutip arnaq toqunniarlugu savimmik kaperiaraluarsimavaa.
Toqutseriarneq iluatsinngilaq, arnarli natermut uppippoq.
Unnerluussissummilu allaqqasut naapertorlugit, pinerliisup arnaq ima aperisimavaa: "Nipaatsumik toqorusuppit? Imaluunniit anniarlutit toqorusuppit?".
Arnarli pinaalluni najummineqarnerunnaarami qimaasinnaanngorsimavoq.
Pinngitsaaliilluni atoqatiginneriaraluartoq
Angut arnamut piffissap tamatuma nalaani pinngitsaaliilluni atoqatiginneriaraluarsimasutut aamma unnerluussaaqqavoq.
Angut apriilimili tigummigallagassanngortitaavoq tarnikkut nappaatillit napparsimaviannut Danmarkimiittumut inissinneqaqqalluni, unnerluussisuutitaasullu, qulaani allanneqareersutut, unnerluussap eqqartuussinerup kingorna tassunga killiligaanngitsumik inissinneqarnissaa piumasaqaatigaa.
Naak suliaq Qaqortuminngaanneeraluartoq eqqartuussineq ajornaatsumik ingerlanissaa pissutigalugu Nuummi pissasoq, unnerluussisuutitaasoq KNR-imut oqarpoq.
