Miilu aqqanilinnik ukiulik atuariartoraangat Trump inimi atuartitsiviusumi initusaqaaq
Nunarsuarmi nutaarsiassaqartitsivinni saqqummerasuartitsinermik pilersitsivoq, nunarsuarlu tamakkerlugu tusagassiortut Kalaallit Nunaannukaapput.
Amerikap præsidentiata Kalaallit Nunaannik tiguaanissamik kissaateqarnera soorunami pineqarpoq. Donald Trumpip oqaatigisaqattaartuagaa: Nunap isumannaatsuunissaanut USA-p Kalaallit Nunaat pisariaqartippaa.
Naak Qanorooq aallakaatinneqalertillugu aallakaatitsiviup saavanut immaqa meeqqat ikinnerpaat ingilluartitaartaraluartut, Donald Trumpip Kalaallit Nunaannik kissaateqarnera meeqqanit puiguikkiunneqartarpoq.
Atuarfimmittaaq tamanna pillugu oqaloqatigiissutigineqartartoq, Miilu Lindberg Boassen aqqanilinnik ukiulik Nuummi najugaqartoq oqaluttuarpoq.
- Erserulooraluarama. Anaanagalu oqaluukkatta massakkut ajunngilanga. Massakkut ersiunnaarpunga, taanna oqaluttuarpoq.
Meeqqat qanoq oqaloqatigineqassappat?
Angajoqqaanit ernumasunit, Meeqqat pisinnaatitaaffii pillugit sullissivik MIO qaammat una sianerfigineqartarpoq. Sullissivimmi meeqqat pillugit oqaaseqartartoq Stina Sværd oqaluttuarpoq.
- Angajoqqaat ilai, meeqqatik unnuami sininnaveertut, naarluttut susoqaratarsinnaaneranullu pissangasorujussuusut oqaluttuarput. Meeqqat alapernaatsuullutillu apersortuuneri pissutigalugit, meeqqat pisoq pillugu qanoq oqaloqatigineqarsinnaanerinik siunnersuutinik pitsaasunik pissarserusullutik angajoqqaat allat sianertarput, meeqqat pillugit oqaaseqartartoq oqarpoq.
Stina Sværdip siunissaq pillugu aarleritsassimaarnermik qularnermillu sunnerteqqanera piffissami matumani misigaa.
MIO politikikkut pissutsini pissanganartorsiorfioqisuni, nunatsinni meeqqanut inuusuttunullu sunniutai pillugit itisiliisussamik nutaamik misissuileruttorpoq. Tamanna sullissivimmut, meeqqanut angajoqqaanullu toraagalimmik suliniummik suliaqarnissamut ikiuutaassaaq.
Ersissanngitsugut ilinniartitsisoq oqarpoq
Peqqissutsimut Naalakkersuisoq Anna Wangenheim (D) aamma Meeqqanut Inuusuttunullu Naalakkersuisoq Nivi Olsen (D) pissutsit pillugit tusagassiortunut sassarnerminni ataasinngormat oqaaseqarputtaaq. Tassani pissanganartorsiorfimmi meeqqat qanoq oqaloqatigineqarsinnaanersut pillugu angajoqqaanut siunnersuuteqarput.
- Nunarsuarmi pisut nassuiaqqissaarneqarnissaat pineqanngilaq, pineqartorli tassaavoq meeqqap qanoq inneranik eqqumaffiginnilernissaq, apeqqutinik ammasunik aperisarnissaq meeqqallu oqaatsinik paasisinnaasaanik akisarnissaq. Nivi Olsen oqarpoq.
- Meeqqanut qanilaassaagut, eqqarsaataat misigissusaallu pillugit alapernaallutalu tusarnaassaagut. Meeqqat uagut inersimasut qanoq innerput tamaat malugalugulu isigisarpaat. Taamaattumik angajoqqaat eqqissisimanissaat aamma inersimasut ajornartorsiutinik isumaginnittuuneri pillugit meeqqanut qulakkeerinissaat pingaaruteqarpoq, taanna oqarpoq.
Meeqqanut inuusuttunullu pissutsit pillugit ernumasunut siunnersuutissaqarpit?
- Inersimasoq tatigisartik saaffigisinnaavaat. Meeqqalli oqaloqatissaqarsorinngikkunik Tusaanngamut aamma sianersinnaapput, taanna akeqanngilaq ulloq unnuarlu ammasarluni, Stina Sværd oqarpoq.
Naak Donald Trump politikikkullu pissutsit Miilu Lindberg Boassenimut aqqanilinnik ukiulimmut initugaluartut, eqqissisimaneruleqqavoq.
- Annikitsuaqqamik oqaluutilaarnikuuvugut ilinniartitsisorlu, taava ilinniartitsisorput oqarpoq ersissanngitsugut.
- Trumpip Kalaallit Nunaat pisiarissanngilaa, taanna oqarpoq.
