Innuttaasut peqqissusaannik misissuineq ilaqqittoq: Ilumoortumik qanoq ippit?

Qanoq ippit? Ilumoortumik.... qanoq ippit? 

Innuttaasut peqqissusiannik misissuinermi inuit taamatut aperineqartarput. Amerikap præsidentiata tiguaanissamik taamalu pisinissamilluunniit ullut tamakkiallugit ukioq aallartimmagu sioorasaarilluni, Kalaallit Nunaat immikkut ittumik ilungersunartorsiortinneqarnerani amerlasuut eqqissisimannginnermik ernumanermillu misigisimapput. 

Taamaammat piffissami nalinginnaanngitsumi eqqarsartaatsitsigut peqqissuserput misissorniarlugu, immikkut “allamik” innutaasunut misissuineq suliarineqarpoq.

Innutaasunik misissuinermi suliaqartut oqarneri naapertorlugit, misissuinermi peqataaneq minutsit tallimat missaanni sivisussuseqarpoq, QR-kodelu ilanngutassiap uuma naaneraniittoq skannerlugu peqataasinnaavutit. 

Innuttaasut atugarissaarnerisa eqqumaffigineqarnissaat massakkorluinnaq pissutissaqartoq, tusagassiuutinut nalunaarummi allaqqavoq. 

Innuttaasunik misissuineq “nalinginnaasoq” siornali ingerlanneqarpoq - eqqarsartaatsitsigut peqqissuserput pillugu misissuineq nutaaq, ilassutitut misissuineruvoq maanna suliarineqartoq. Misissuinermi inernerit innuttaasunik misissuinernit nalinginnaasunit katersanut siuliilu ilanngullugit sanilliunneqassapput.  

- Taamaaliornikkut innuttaasut eqqarsartaatsikkut peqqissusaannut atugarissaarnerannullu, maanna pissutsit qanoq sunniuteqarsimatiginersut takuneqarsinnaanngussaaq. 

- Misissuinermi inernerit Kalaallit Nunaanni tamanut saqqummiunneqassapput, kisianni aamma immikkut ittumik ilungersunartorsiortitsisoqarnerani inuit ulluinnaannut qanoq sunniuteqartigineri pillugit nunanut tamalaanut paasissutissanngorlugit siammarterneqassapput, tusagassiuutinut nalunaarummi allaqqavoq.

Nalinginnaasumik innutaasunik misissuinermi, inuit taamungaannaq toqqakkat 8.000-it misissuinermi peqataatinneqartarput. Tamanna Kalaallit Nunaanni peqqissusermik Ilisimatusarfiup Ilisimatusarfik aamma Syddansk Universitet suleqatigalugit suliarineqartarpoq.

Pujortarneq, nerisat, timersorneq, kinguaassiutitigut sammivik, eqqarsartaatsikkut peqqissuseq pillugit apersuisoqartarpoq – sammineqartut ilaminiinnaat taallugit.

Paasissutissat kommuninit Namminersorlutillu Oqartussanit atorneqassapput, aamma peqqissutsimik pinaveersaartitsinermillu pingaarnersiuinissamut iluaqutaassapput.

Misissuinerit taama ittut ingerlanneqartut arfinilissaraat. Ukiuni ukunani innuttaasunik misissuisoqarsimavoq: 1993-1994, 1999-2001, 2005-2010, 2014 aamma 2018.