Piffissami matumani unnuakkut eqqissisimanngikkuit sinissaaruttaruilluunniit kisimiinngilatit.

Inuppassuarnummi aamma inuit Danmarkimi kalaallisut tunuliaqutaqartunut ullut sapaatip-akunnerilu makku ilungersunartorujussuupput. Danmarkimi kalaallit peqatigiiffianni Uagut-mi siulittaasoq Julie Rademacher oqarpoq. 

- Inuit ilaanniit siooranermik ajornartorsiuteqartumik ilaqutaqartoq tusarpara. Inupparpassuarniit sininneq ajulertartut tusarpara. Kalaalerpassuit akunnerminni sapaatip-akunnera kingulleq apeqqutigisarpaat: ‘Qanoq sivisutigisumik sinippit?’ aamma 'sininnikuuit?’.

Amerikamiut Kalaallit Nunaannut Danmarkimullu sioorasaarinerannit allamut saalaarnissamut, ikiuigasuarnermik allanillu sammisaqarnissamut neqeroortoqarnissaannik pisariaqartitsisoqartoq, Julie Rademacher allallu kajumissutsiminnik suleqataasa misigaat.

Taamaattumik Uagut aamma Danmarkimi Kalaallit Illutaat, Kalaallit Nunaanni Danmarkimilu oqartussat, peqatigiiffippassuillu, ilaatigut Unicef, Headspace kiisalu Red Barnet peqatigalugit, Kalaallit Danmarkimi najugalinnut Kalaallit Nunaanni Danmarkimilu oqartussat ataqatigiissaakkamik suliniuteqarnissaannut aningaasaliisussarsiorpugut.

- Tamatumunnga suleqatigiippugut, Kalaallit Nunaanni Danmarkimilu marloqiusaanngitsumik suliniuteqarusulluta sapinngisaq tamaat pitsaanerpaamik ataatsimoorluta ataqatigiissaariniarsarivugut, taamaaliorpugut sunniuteqarluarusulluta eqqissisimanissamillu piffissami ilungersunartumi pilersitserusulluta, Julie Rademacher KNR-imut oqarpoq.

Akeqanngitsumik ikiuigasuarneq suliniutit ilagissavaat. Tamannami pisariaqartinneqarpoq, taanna paasissutissiivoq.

- Inuppassuarnit ernumallutillu annilaangasunit saaffigineqartarpugut. Taamaattumik immitsinnut ikioqatigiissinnaajumalluta siunnersuinermut, aqqutissiuussinermut, ikiuigasuarnermut tarnikkullu tapersersuinermut najoqqutassiornissatsinnut ataqatigiissaakkamik suliniuteqarnissarput aallartisarparput. Pingaartumik aamma meeqqatta qanoq piffissami ilungersunartumi oqaloqatigisinnaanerivut.

Najoqqutassiaq piareertoq – aningaasat amigaatigineqartut

Uagut ikiuigasuarnissamut sammisassanullu allanut neqerooruteqarnermi paasissutissiinermut quppersagaaqqanut naqiterititsinissamut aningaasaliisussarsiorpoq. Quppersagaaqqat Kalaallit Nunaat tamakkerlugu Danmarkimilu illoqarfinni anginerni agguaanneqassapput, soorlu aamma Uagut nittartagaani takuneqarsinnaajumaartut.

Tamatuma saniatigut soorlu ikiorneqarasuarnissamut periarfissat pillugit qaammarsaanermut, TV-kkut inoqatinullu attaveqaatitigut saqqummiunneqarsinnaasunik, Uagut kissaateqarpoq.

Kisianni aamma aningaasat ilai sammisassaqartitsinermut atorneqarnissaat pingaaruteqarpoq, Julie Rademacher isumaqarpoq.

- Skærmit inoqatinullu attaveqaatit alalaarnissaat, eqqissillunilu naapisimaarnissarput pisariaqartipparput, taanna KNR-imut oqarpoq. 

Uagut-mi siulittaasoq nammineq qanoq innersoq aperineqarami akivoq:

- Filmi nuanniitsutut piffissaq manna misigaara. Soorlu sinnattupilummiit iterneq ajulerluni. Annilaanganermali aqulissanngikkaanga aalajangerpunga. Annilaanganerup aqussanngilaatigut. Taakkuaaku taamaatsikkusukkaatigut, Julie Rademacher Trumpip atorfilittai innersuullugit oqarpoq.

Akerliussutsimik takutitsinerni tapersersorneqarnermut qujassuteqartoq

Præsident Trumpip Kalaallit Nunaannik aqutsilerusulluni oqarneranut akerliliillutik, Kalaallillu Nunaannut tapersersuinermik takutitsisumik, Uagut Københavnimi akerliussutsimik takutitsinermi sapaatip-akunnerata naanerani kingullermi aaqqissuisuuvoq. Akerliussutsimik takutitsinerit assingusut aamma Odensemi, Aarhusimi Aalborgimilu allanit aaqqissuunneqartut pipput.

Sumiiffinni tamani Kalaallit Nunaannik tapersersuinerminnik takutitsiniarlutik  inuit tuusintilippassuit takkussuupput. Uagut tapersersuinermut tamatumunnga qujassuteqarlutik tusagassiuutinut nalunaaruteqarput.

- Nunarsuarmi politikikkut uungaannaq isigaluni iliuutsininngarnit sorsuutissaqarnerusoq nunarsuaq tamakkerlugu takutipparput. Inuit siunissaminnik aalajangiisinnaanerannik pisinnaatitaaffeqarnerat pineqarpoq, Julie Rademacher tusagassiuutinut nalunaarummi oqarpoq.

Uagut-mi siulittaasup oqarnera naapertorlugu – Danmarkimi Kalaallit Peqatigiiffia – Kalaallit Nunaannut ilungersunartorsiortitsinerujussuaq, Danmarki Kalaallit Nunaallu ataqatigiinnerulerneranut pilersitseqataavoq. 

- Eqqissiviilliortoqarnerani nuannersortaqartoq: Kalaallit danskillu aatsaat taamak qaninnerulertigipput. Misigalugu killitsisimaarnarpoq, taannalu attaveqatigiinneq saammaateqatigiinnerlu inerisartuassavarput.

Kalaallit Nunaanni najugaqaruit meeraallutit inuusuttuullutilluunniit oqaloqateqarnissamillu pisariaqartitsillutit, Tusaanngap oqarasuaataanut 80 11 80-imut sianersinnaavutit.