Kangerlussuarmi ukiuunerani umimmanniarneq kinguartinneqartoq
Maniitsup aqutsiveqarfiani Kangerlussuarmi piniarfik 2-mi 3-milu umimmanniarneq januaarip 31-anni aallartittussaagaluarpoq, piniarfik 2-milu aamma februaarip 14-ianni umimmanniartoqarsinnaalertussaagaluarpoq.
Silalli allanngorarnera, Kangerlussuup qinnguani suli sikoqalersimannginnera nunamilu aputeqarpiannginnera pissutigalugu kinguartinneqarpoq.
Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik, tusagassiuutinut nalunaarummi allappoq.
Kangerlussuarmilu pissutsit pillugit, aalisartut piniartullu kattuffii Qeqqata Kommunialu Naalakkersuisoqarfiup suleqatigai, taamaalillutik ukiuunerani umimmanniarnerup qaqugu aallartinnissaa kingusinnerusukkut aalajangiiffigissallugu, tusagassiuutinut nalunaarummi allapput.
