Kommune: Inuusuttunut inerisaavik nutaaq angusaqarfiulluarpoq

Inuusuttunut piginnaasakillissimasunut inerisaavik inuusuttunut imminut tatiginninnerulersitsisoq kommune allappoq.

Allattoq Markus Valentin

januaarip 29-at 2026 13:29

Kommuneqarfik Sermersuup inuusuttunut 16-init 28-nut ukiulinnut, tarnikkut timikkullu piginnaasakillisimasunut inerisaavik siorna aggustimi ammarpaa.

Taakku piginnaasaanik ineriartortitsinissaq uani sammineqarpoq.

Kommunip tusagassiuutinut nalunaaruteqarnerminni inuusuttut sisamat eqimattami siullermiissimasut tusagassiuutinut nalunaarummi nassuiaatigaa.

- Inuusuttuni peqataasuni siullerni pitsaasumik ineriartornermik takuvugut. Inuttut ataasiakkaatut ineriartorput aamma imminnut tatiginerulerput,

Malene Henningsen Jensen tusagassiuutinut nalunaarummi oqarpoq. Taanna Inerisaavimmi aqutsisuuvoq.

Inerisaavik ilisimasaqarfigineruleruk

Inuusuttut tarnikkut aamma/imaluunniit timikkut piginnaasakillisimasut, ilinniagaqarnerup iluani imaluunniit suliffeqarnermut tunngasuni unammilligassaqarsimasut neqerooruteqarfigineqarput.

Ingerlatsineq ukiumik ataatsimik sivisussuseqarpoq, tassanilu inuttut ineriartorneq, inuttut piginnaasat suliamullu tunngatillugu qulaajaaneq sammineqarlutik.

Inuusuttut ataasiakkaat pisariaqartitaat aallaavigalugit avatangiisini toqqissisimanartuni aaqqissuussaasunilu inertornissamut periarfissaqartitsinissaq siunertaavoq.

Ulluinnarni piginnaanernik aamma namminneersinnaanermik, inuttut atassuteqarnernik pilersitsinermik nukittorsaaneq, ilinniarnikkut aamma suliffitsigut periarfissanik qulaajaaneq kiisalu nammineq inissisimaffimmut, inuiaqatigiinnut kulturikkullu ikorfartuineq ilaatigut suliarineqassapput.

Paasissutissarsiffik: Kommuneqarfik Sermersooq

Allisiguk

Danmarkimut taarsiullugu periarfissaq alla

Kommunip inerisaavik ukiunut sisamanut misiliutitut suliniutigineqartumut ilaasutut nassuiaatigaa.

Inuusuttut Danmarkimi inuusuttunut immikkut pisariaqartitsisunut ilinniarfimmut (STU) taarsiullugu kalaallit allamik periarfissaqalersinneqarnissaat siunertaavoq.

- Sulisut oqaatsiminnik ilitsoqqussaminnik oqaluttut naapittarpaat, aamma taamaalillutik ilutigisaanik kulturinut nutaanut nalimmassartariaqaratik. Ineriartornissamut pitsaanerusumik tunngavissaqarluarnerulissapput, Malene Henningsen Jensen tusagassiuutinut nalunaarummi oqarpoq.

Ukiut sisamat misiliiffiusut naammassippata suliniut qanoq aaqqissuuteqqinneqassanersoq kommunalbestyrelsip aalajangiiffigissavaa.

Inerisaavik inuttut iluanaaruteqarfiullunilu aningaasatigut iluanaaruteqarfiusutut nassuiaatigaa, nunamimi allamiinneq amerlasuutigut aningaasartuutaanerusarmat.

Ima inissarsissaatit

Kommunimi inunnik sullissisut aqqutigalugit inissarsisoqarsinnaavoq.

Inuusuttut immikkut pisariaqartitsisut – imaluunniit qanigisaasut inuusuttumik neqeroorummik iluaqutiginnissinnaasumik nalunngisaqartut sullissisuminnut paasissutissanik allanik pissarsiniarlutik attaveqarnissaat kaammattuutigineqarpoq.

Paasissutissarsiffik: Kommuneqarfik Sermersooq

Allisiguk

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.