Unnerluussisussaatitaasut Emanuel Nûkop pinngitsuutinneqarnera suliassanngorteqqissanerlugu isumaliutigigaat
Emanuel Nûko pinngitsuutinneqarpoq.
Inatsisartunut ilaasortap pinngitsuutinneqarnissaa, Eqqartuussisoqarfik Sermersuup Tasiilami sapaatiummat aalajangerpaa.
Kalaallit Nunaanni Politiini unnerluusisussaatitaasuunerup, Lars Petersenip oqarnera naapertorlugu Emanuel Nûko pissutsini marlunni unnerluussutigineqartuni pinngitsuutinneqarpoq, aamma naak unnerluussisussaatitaasut suliamut atatillugu naammattunik uppernarsaatissaqarsorigaluartut.
- Pineqaatissiinissamut suliani taamaattoqartuaannarpoq, tassa unnerluussisussaatitaasut unnerluussummik eqqartuussivimmut nassiussigaangamik pasineqartoq eqqartuunneqartariaqartoq isumaqartarpugut, unnerluussisussaatitaasuuneq, Lars Petersen KNR-imut oqarpoq.
Nakuusernermi poliitillu peqqussutaanik unioqqutitsisimasutut pinngitsuutinneqartoq
Emanuel Nûko pissutsini marlunni unnerluutigineqarpoq.
Unnerluussimmi siullermi politiit Kommuneqarfik Sermersuumi malittarisassaannik paragraf 18-imi immikkoortoq 3-mik inuup unioqqutitsineranut imaluunniit politiit peqqussutaannik malinninnginnermut tunngavoq.
Eqqartuussiviup unnerluussummi tassani pisup tamanit ornigarneqarsinnaasumi pisimannginnera unnerluutigineqartorlu allanut nipiliorsimannginnera imaluunniit ajoqutaasimannginnera kiisalu politiinut qunusaarisumik iliuuseqarsimannginnera pingaartuutippaa.
AAMMA ATUARUK Emanuel Nûko pinngitsuutinneqarpoq
Unnerluussutit aappaani Emanuel Nûko inummut tunuatigut marloriarluni anaasisimasutut unnerluutigineqarpoq, tassanili ilisimannittutut nassuiaateqartup Emanuel Nûkomit niaqqumigut annersinneqarsimannginninini eqqartuussivimmut oqaatigaa.
Eqqartuussut suliassanngorteqqissanerlugu isumaliutigigaat
Eqqartuussisup aalajangiinera tunngavigalugu unnerluussisussaatitaasut suliamik Nunatta Eqqartuussisuuneqarfianut ingerlatitseqqissanerlutik isumaliutiginninnissamut ullunik 14-inik periarfissaqarumapput.
Taamaammat tusarliupparput
Emanuel Nûko Naleqqameersoq qinikkatut sulilluni politikeriullunilu Inatsisartuni Kommuneqarfik Sermersuullu kommunalbestyrelsiani ilaasortaammat, taassuma eqqartuussivilersuunneqarnera tusarliupparput.
Taamaammat tamanna tamanut saqqiummiunneqartariaqartoq, KNR isumaqarpoq.
- Eqqartuussiviup suut pingaartuutissimanerai uppernarsaatillu taakku suliami uppernarsaatigineqartut tunngavilersorneqarnerat maanna naliliiffigissavarput, tamatumalu kingorna suliamik suliassanngortitseqqinniarnerluta aalajangiiffigissavarput. Tamanna ulluni qaninninnerni aalajangiiffigissagipput isumaqarpunga, Lars Petersen oqarpoq.
Tigusarineqartoq seqqartaammillu qasilitsortalimmik seqqarneqartoq
Emmanuel Nûko Tasiilami nakuuserniartutut pissusilersorsimanera tamanullu ammasumi toqqissiviilliortitsisimasutut maajip ulluisa 16-ianni 2021-mi unnukkut qulinngoriitsiartoq tigusarineqartoq, unnerluussisussaatitaasup allagaani tamanna takuneqarsinnaavoq.
AAMMA ATUARUK Politiit Emanuel Nûko aalakoortoq qasilitsortalimmik seqqaraat
Taassuma politiit peqqussutaat ilaatigut malikkumasimanngilai taarsiullugulu politiinut qunusaarerpasittumik pissusilersuuteqarluni.
Tamanna pissutigalugu politiit tigusarinninniarlutik seqqartaammik qasilitsortalimmik atuinerannik kinguneqarpoq.
Unnerluussut naapertorlugu unnerluussisussaatitaasut Emanuel Nûkop ulluni 30-ni pineqaatissinneqarsimasunut inissiisarfimmiitsinneqarnissaa piumasaraat.
