Politiit Emanuel Nûko aalakoortoq qasilitsortalimmik seqqaraat
Nutartigaq: Emanuel Nûkop eqqartuussivilersuunneqarnissaa sapaatiuppat nalunaaqutaq ataatsimut kinguartittoq, Kalaallit Nunaanni Politiini unnerluussisussaatitaanerusoq Claes Vestergaard KNR-imut oqarpoq.
Emanuel Nûkop inuk niaquatigut marloriarluni annerseriarlugu ajallugu orlutissimagaa, KNR-ip allagaatinik pissarsiarisaani atuarneqarsinnaavoq.
Taanna Naleqqameersuusoq Inatsisartunilu ilaasortaasuusoq nakuusersersimasutut Taasiilami pissussamik Eqqartuussisoqarfik Sermersuumi sapaatiuppat unnerluutigineqassaaq.
Unnerluussummi, Emanuel Nûkop 2021-imi maajip arferngani unnukkut qulip missaani nakuusersimasoq atuarneqarsinnaavoq.
Imigassartungaatsiarsimasoq
Emanuel Nûko
Emanuel Nûko Naleqqameersoq, inatsiartunut ilaasortaavoq, Kommuneqarfik Sermersuumilu kommunalbestyrelsinut ilaasortaalluni.
Emanuel Nûkop eqqartuussaanissani siorna septembarimi nammineerluni paasissutissiissutigaa, tamatumalu kingorna Inatsisartut matoqqasumik ataatsimiinnerminni taassuma unnerluutigineqarsinnaannginneranik atorunnaarsitsinissartik aalajangerpaat.
Emanuel Nûko unnerluutigineqarnermi kingunitsianngua Inatsisartunit Kommuneqarfik Sermersuumiillu sulinngiffeqannginnissamik qinnuteqarpoq.
Inatsisartunut ilaasortaq allakkami unnerluussummi allassimasoq naapertorlugu 15-it 20-llu akornanni imigaqarsimasoq atuarneqarsinnaavoq.
Emanuel Nûkop inummut allamut nipituuliorluni assortuussuteqartoq, kingornalu arlaleriarluni niaquatigut annersillugulu uppisillugu ajakkaa, allaqqavoq.
Politiit aggersarneqarmata, politiinit eqqissisarneqaraluarpoq, iluatsinngitsumilli.
Taanna nikorfaffimminit nikissanngitsoq marloriarluni politiinit oqarfigineqaraluarpoq. Taannali pinaaserluni politiinut tallini atorlugit annersitsivoq.
Politiit seqqartaammik qasilitsortalimmik seqqaasariaqartut
Sooruna allaaserigipput?
Eqqartuussivimmi suliat suli inaarneqanngitsut KNR-imiit saqqummiunneq ajoraluarpagut.
Emanuel Nûkomulli tunngasut immikkut pisuupput. Taannami Naleqqami innuttaasunit qinikkatut politikeriuvoq, Inatsisartunut ilaasortaavoq, Kommuneqarfik Sermersuumilu kommunalbestyrelsimi ilasortaalluni.
Tamanna tunngavilersuutigalugu KNR-ip suliaq ammasumik saqqummiuppaa.
Emanuel Nûkop peqqarniitsumik pissusilersornerani politiit qasilitsortalimmik seqqarsinnaallugu aarlerisaarpaat.
- Soqutaanngilaq, Inatsisartunut ilaasortaq unnerluussut naapertorlugu politiinut akivoq, qunusaareqqilerlunilu.
Politiit Emanuel Nûko seqqartaammik qasilitsortalimmik seqqarpaat, tigusaralugulu.
Emanuel Nûko inissiisarfimmiitinneqarnissaa piumasarineqartoq
Eqqartuussivimmi suliaq Tasiilami ullumi ingerlanneqarpoq.
Unnerluussisut ulluni 30-ni pineqaatissinneqarnissaa piumasaraat.
Allakkami unnerluussummi allaqqasoq naapertorlugu Emanuel Nûkop Pinerluttulerinermi inatsimmi paragraf 88 malillugu politiit najoqqutaanik unioqqutitsisimasutut Eqqartuussisoqarfik Sermersuumi unnerluutigineqarpoq.
Kommuneqarfik Sermersuumi politiinut ileqqoreqqusamik unioqqutitsisimaneraaneq politiit peqqqussutaannik malinnissimannginneranut unioqqqutitsisimaneranulluunniit tunngavoq.
Pinerluttulerinermi inatsimmi paragraf 88 nakuusersimanermut tunngassuteqarpoq.