UNICEF: Naalakkersuisut meeqqat tusaaneqarnissaat qulakkiivinngilaat

Nunarput meeqqanik politikkikkut ukiut 30-t matuma siornatigut ukkassilerpoq.

Nunarpummi Naalagaaffiit Peqatigiit meeqqat pisinnaatitaaffii pillugit isumaqatigiissusiaannut taamanikkut ilannguppoq. Tamannalu Nuummi kulturikkut illorsuarmi, Katuami, malunnartinneqarmat, politikerit nuimasut, suliniaqatigiiffiit arlaannaannulluunniit attuumassuteqanngitsut aamma meeqqanut inuusuttunullu naalakkersuisoq, Mimi Karlsen, peqataasunut ilaapput.

Meeqqat pisinnaatitaaffii pillugit suliat naammaqqajanngitsut, Meeqqat Illersuisuat Aviâja Egede Lynge aamma UNICEF KALAALLIT NUNAANNIMI suliniutinut pisortaq Maliina Abelsen isumaqarput.

- Meeqqat pisinnaatitaaffii pillugit isumaqatigiissummi allaaserisat aqqaneq-aappaata meeqqaat tusaaneqarnissaannik qulakkeerinissamut tunngasuusup naammassinissaanut iliuuseqartoqarnerusariaqartoq isumaqarpugut, Maliina Abelsen oqarpoq.

Kivitseqatigiilluaqatigiitta

UNICEF Danmark aamma Namminersorlutik Oqartussat NAKUUSA-mik taallugu 2011-mi suleqatigiilerput.

Tassa meeqqat pisinnaatitaaffiinik paasisimasaqarnerunissaq meeqqallu politikkikkut oqallisigineqarneranni peqataatinneqarnerunissaat siunertaralugit taamaaliorput.

NAKUUSA-llu suliai naammagisimaaraluarlugit NAKUUSA 2.0-qalernissaa piffissanngortoq, Maliina Abelsen isumaqarpoq:

- Meeqqat politikkikkut oqallisigineqarneranni tusaaneqartarnissaasa inatsisitigut piumasaqaataalernissaa NAKUUSA 2.0-mi siunertaavoq. Meeqqat politikkikkut aalajangiinerni tusaaneqarlutillu peqataatinneqartalernissaat angorusupparput, taanna oqarpoq.

Ullutsinni peqataatinneqartariinnginnamik?

- Naagga. Suliat ilaanni peqataatinneqartarput, allaniunngitsorli.

Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen (IA), isumaqataanngilaq. Taanna Qanoruumi ippassaq sisamanngornermi ima oqarpoq:

- Ukiuni kingullerni una eqqumaffigivarput, meeqqat isumaat ilaatittarsimavagut? Massakkut taanna assigiinngitsut tikkuartorneqartoq aamma eqqumaffigivarput, meqqaat isumaat qanoq innikkut uagutsinnut apuuppata, aamma uagut akisarnissarput.

Meeqqat pisinnaatitaaffii pillugit kanngunarsaanerit ilungersunartut

Naalakkersuisut nunatta Naalagaaffiit Peqatigiit meeqqat pisinnaatitaaffii pillugit isumaqatigiissutaannik piffissami 2023-mit 2030-mut malinninnissamut iliuusissatut pilersaarut 2022-p naanerani saqqummersippaat.

Iliuusissatut pilersaarut amigarlunilu sammiveqanngissoralugu Meeqqat Illersuisuata sapaatip akunnerani matumani oqaatigaa.

- MIO-p ilisimasanik katersuinera Nuna tamakkerlugu ingerlasup ersarivissumik takutippaa, Meeqqat Isumaqatigiissutaanni allaaserisat 19-it suli malinneqanngitsut, tassanilu pineqarluni meeqqanut kanngunarsaanerit ilungersunartut, taanna oqarpoq.

Maliina Abelsenip UNICEF-ip suliniutit suliniutinik misissuiffigineq ajorai susassaqarfilli tamarmi isiginiartaraa oqaatigaa.

- Angusaqarniarluarluni suliaqartoqarnissaa pisariaqarnera pillugu meeqqat illersuisuat isumaqatigaara. Kisianni aamma piffissap unilaarluni suliarineqarsimasunik misissuiffigeqqissaarneqarneranut atorneqarsinnaalera takorloorsinnaavara. Taama suna iluaqutaasimanersoq sunalu iluaqutaasimannginnersoq takuneqarsinnaavoq, taanna KNR-imut oqarpoq.

Meeqqat suli naammattumik akuutinneqanngikkaluarpata NAKUUSA-p sunniuteqarnera naammassimassasoraagu?

- Aap. NAKUUSA allannguuteqartitsingaatsiartoq kisiat oqaatigisinnaavara. Suliarineqarsimasut tulluusimaarutigilluinnarpakka. Ajornartorsiutaasunut aaqqissutissaq ataasiinnaasorinngilara. Kisianni Meeqqat Pisinnaatitaaffii pillugit isumaqatigiissummut qanoq pitsanngorsaaqataasinnaanerluta ukkatarinneqataasinnaavugut.