MIO periusissaq pillugu: Innuttaasut akuutinneqarnissaanut aningaasaliisoqartariaqarpoq
Ukiaanerani ataatsimiinneq aallarnerlugu Inatsisartut ataatsimiittaarfiani sianeq kasunneqarpat, FN-ip Meeqqqat pillugit Isumaqatigiissutaata nunatsinni malinneqarnissaanut periusissatut pilersaarusiaq saqqummiussassat ilagissavaat.
AAMMA ATUARUK Naalakkersuisut: FN-ip Meeqqat pillugit Isumaqatigiissutaata inatsisinngortinnissaa akisussaqaaq
Meeqqanut Nalaakkersuisup Paneeraq Olsenip (N) pilersaarutaa taammaappoq.
Naalagaaffit Peqatigiit Meeqqat pillugit isumaqatigiissutaat sunaana?
Danmarkimi naalagaafiup siunnersuisoqatigiivini Meeqqat siunnersuisoqatigiivi, meeqqat inuusuttullu pisinnaatitaaffiinik qulakkeerisussat naapertorlugit meeqqat pillugit isumaqatigiissut maleruagassanik assigiinngitsunik nunanit malinneqartussaasunik ilaqarpoq.
Isumaqatigiissut Danmarkimi 18-it inorlugit ukiulinnut nunanit suminngaaneeraluartunulluunniit tamanut atuuppoq. Isumaqatigiissutip meeqqamut pitsaanerpaasoq tunngaviusumik qulakkeerniartarpaa:
- Meeqqap tunngaviusumik pisinnaatitaaffii, soorlu nerisaqarneq, peqqinneq, siniffissaqarnerlu.
- Meeqqap ineriartornissamut pisinnaatitaaffii, soorlu atuarneq, sunngiffeqarneq, pinnguarneq paasissutissarsineq.
- Meeqqap illersorneqarnissamut pisinnaatitaaffii, soorlu sorsunnermut, nakuusernermut, atornerluinermut atuinerlunnerlu.
- Meeqqat aalajangeeqataasinnaanermut pisinnaatitaaffii, soorlu sunniuteqaqataaneq, peqataaneq, killiligaananilu oqaaseqarsinnaaneq.
Meeqqat pillugit isumaqatigiissut pillugu annerusumik uani atuagaqarit.
Paasissutissarsiffik: Meeqqat siunnersuisoqatigiivi.Periusissarlu meeqqat illersuisuannut Aviâja Egede Lyngemut neriulersitsivoq. - Piffissaq ungasinnerusoq pillugu pilersaarutaanissaa ataqatigiissaarinermullu pilersaarutaanissaa naatsorsuutigaara.
- Tassami FN-ip meeqqanut Isumaqatigiissutaani innersuussutit arlalillsuit maanna malinneqanngillat, Aviaaja Egede Lynge KNR-imut oqarpoq.
Pappiaraq puigugassaq
Meeqqanulli illersuisoq nuna tamakkerlugu periusissatut pilersaarut pillugu aamma aarlerissuteqarpoq:
- Innuttaasut peqataatinneqarnissaanut immikkut aningaasaliisoqarsimannginnera ernumassutigaara, innuttaasummi peqataatinneqarnissaat pingaaruteqartorujussuuvoq.
- Periusissiaq pappiaraannaassanngippat innuttaasut piginneqataasutut misiginissaat pingaaruteqarpoq, meeqqanut illersuisoq oqarpoq.
Meeqqat atugaat malunnaatilimmik pitsanngussappata innuttaasut peqataatinneqarnissaat taassuma pingaaruteqarsoraa.
- Allaffiit aallaavigalugit innuttaasut ilanngunnagit ukiorpassuarni aaqqiiniartoqartarpoq. Ajornartorsiutit aaqqinniagassagut ilaqutariinniipput inuiaqatigiinniillutilu.Taakkulu aaqqiissutissanik aamma peqartarput.
- Taamaammat inuiaqatigiittut nunatullu ingerlaqqissagutta innutaasut peqataannissaat avaqqussinnaanngilarput, Aviâja Egede Lynge oqarpoq.
Tamatta akisussaaffeqarpugut
Meeqqat illersuisuat isumaqarpoq FN-ip meeqqat pillugit Isumaqatigiissutaata piviusunngortinnissaanut periusassatut pilersaarut akisussaaffiit sumiinnerinik ersersitsissasoq.
- Naalakkersuisut, kommunit, angajoqqaat innuttaasullu sunik akisussaaffeqarnersut periusissatut pilersaarummi erseqqissarneqassaaq, Aviâja Egede Lynge oqarpoq.
AAMMA ATUARUK Anna Wangenheim meeqqat pillugit isumaqatigiissut pillugu: Aallartiaanngikkutta akisunerussaaq
Paneeraq Olsenip Anna Wangemheimmimut akissutaa naapertorlugu periusissatut pilersaarutip piviusunngortinnissaata qanoq akeqarnissaa suli ilisimaneqanngilaq.
Meeqqallu illersuisuat isumaqarpoq innuttaasunik peqataatitsineq allanngueqataasinnaasoq:
- Innuttaasut atukkatik pillugit tusarneqartariaqarput, uagullu kisitta suliniutinik kivitsisinnaanngilagut, meeqqat atugaat pitsanngussappata innuttaasut tamarmik peqataasariaqarput.
