Naalakkersuisut: FN-ip Meeqqat pillugit Isumaqatigiissutaata inatsisinngortinnissaa akisussaqaaq
FN-ip Meeqqat pillugit Isumaqatigiissutaata nunatsinni atuutilernissaa siunertaralugu periusissatut pilersaarusiaq qaqugu saqqummiunneqassanersoq Anna Wangenheimip apeqqutigaa. Naalakkersuisummi Inatsisartunit 2015-imi ukiakkut taamaaliornissamik piumaffigineqarput.
Periusissiamillu suliaqarnissaq pisariusoq Meeqqanut Inuusuttunut Ilaqutariinnullu Naalakkersuisoq Paneeraq Olsen naqissusiivoq. Meeqqammi illersorneqarnissaat pillugu piginnaatitaaffiit assigiinngitsut amerlasuut isumaqatigiissummiipput.
Naalagaaffit Peqatigiit Meeqqat pillugit isumaqatigiissutaat sunaana?
Danmarkimi naalagaafiup siunnersuisoqatigiivini Meeqqat siunnersuisoqatigiivi, meeqqat inuusuttullu pisinnaatitaaffiinik qulakkeerisussat naapertorlugit meeqqat pillugit isumaqatigiissut maleruagassanik assigiinngitsunik nunanit malinneqartussaasunik ilaqarpoq.
Isumaqatigiissut Danmarkimi 18-it inorlugit ukiulinnut nunanit suminngaaneeraluartunulluunniit tamanut atuuppoq. Isumaqatigiissutip meeqqamut pitsaanerpaasoq tunngaviusumik qulakkeerniartarpaa:
- Meeqqap tunngaviusumik pisinnaatitaaffii, soorlu nerisaqarneq, peqqinneq, siniffissaqarnerlu.
- Meeqqap ineriartornissamut pisinnaatitaaffii, soorlu atuarneq, sunngiffeqarneq, pinnguarneq paasissutissarsineq.
- Meeqqap illersorneqarnissamut pisinnaatitaaffii, soorlu sorsunnermut, nakuusernermut, atornerluinermut atuinerlunnerlu.
- Meeqqat aalajangeeqataasinnaanermut pisinnaatitaaffii, soorlu sunniuteqaqataaneq, peqataaneq, killiligaananilu oqaaseqarsinnaaneq.
Meeqqat pillugit isumaqatigiissut pillugu annerusumik uani atuagaqarit.
Paasissutissarsiffik: Meeqqat siunnersuisoqatigiivi.
300 millionit koruunit amigaataasasut
Taamaammat aalajangernerup aningaasatigut allaffissornikkullu kingunissai pillugit Naalakkersuisut immikkut ilisimasalinnik misissuititsipput.
Danmarkimi inunnik isumaginninnermut nunamullu namminermut ministereqarfiup ataani Kora, nuna tamakkerlugu kommunit nunallu immikkoortortaqarfiisa instituttiat aamma professor Michael H. Jensen Aarhus Universitetimi atorfeqartoq misissuisuupput.
Periusissatut pilersaarusiassap piviusunngortinneqarnissaata qanoq akeqarnissaa suli nalunartoq, Paneeraq Olsen, Meeqqanut Inuusuttunut Ilaqutariinnullu Naalakkersuisoq allappoq.
- Periusissatut pilersaarusiassap piviusunngortinnissaata qanoq akeqarnissaa maannangaaq naatsorsorneqarsinnaanngilaq, taanna allappoq.
Misissuinerilli takutippaat nunani allani misilittakkat missingersuinermut atorneqarsinnaasut. Finnmarkimi Norgimi pisimanertut FN-ip Meeqqat pillugit Isumaqatigiissutaata nunatsinni atuutulernissaanut ukiumut 300 millionit koruunit amigaataassasut naatsorsuutigineqarsinnaapput, Naalakkersuisoq allappoq.
- Ataatsimut isigalugu akiligassat millioninik pingasunik kisitsisitalinnik amerlinissaat naatsorsuutigineqarsinnaavoq, tamatuma saniatigut sulisut tassunga tunngasumik suliaqartussat amerlanerulissapput taakkulu amerlassusissaat oqaatigiumiunaappoq, ullumikkullu tamakkuninnga suliaqartunik pikkorissunik sulisussarsiorneq ajornakusooreerpoq, pingaartumik nunaqarfinni illoqarfinnilu inukinnerusuni.
Paaneeraq Olsenip oqarnera naapertorlugu Naalakkersuisut FN-ip Meeqqat pillugit Isumaqatigiissutaata nunatsinni atuutilernissaanut pilersaarummik Inatsisartut ukioq manna ukiaanerani ataatsimiinneranni saqqummiussisssallutik pilersaaruteqarput.
