Meeqqat Illersuisuat: Naalagaaffiit Peqatigiit meeqqat pisinnaatitaaffii pillugit aalajangersagaat kommunit ilaannit malinneqanngilaq
Inunnik isumaginninnermut siunnersortitut ilinniagaqarsimanatik, inunnik isumaginninnermut suliallit kommunini amerlaqaat, sulisullu ataasiakkaat inunnik amerlasuunik sullissaqarput, inuit 100-t tikillugit sullissaralugit.
Naalagaaffiit Peqatigiit Meeqqat pillugit aalajangersagaata eqquutsinneqarnissaa taamaammat ajornakusoorsinnaassaaq.
Meeqqanik inuusuttuaqqanillu ikiorsiisarneq pillugu inatsimmut Naalakkersuisut allannguutissatut siunnersuutaannut atatillugu Meeqqat Illersuisuat Aaja Chemnitz Larsen, taama oqarpoq:
- Inunnik isumaginninnermut siunnersortimik ataatsimik kommunit sulisoqakkajuttut maluginiarparput, taannalu aqutsisutut inissimakkajuttarpoq, sullissisunillu ataani inissisimasoqakkajuttarpoq. Taakku allaffissornermik allanillunniit ilinniagaqarsimasuusarput, inatsillu atuutsilersinneqarnissaanut immikkut ilinniarsimasuunatik. Sulisut taamaammat piginnaanngorsarneqarnissaat kommunini sulissutigineqartariaqarpoq, assersuutigalugu meeqqanik sullissinermi immikkut piginnaanngorsaasoqartariaqarluni, Meeqqat Illersuisuat Aaja Chemnitz Larsen, Naalakkersuisut allannguutissatut siunnersuutaannut atatillugu oqarpoq.
Naalakkersuisut meeqqanik inuusuttuaqqanillu ikiorsiisarneq pillugu inatsimmut allannguutissatut siunnersuusiornermikkut meeqqat pisinnaatitaaffii nukittorsarniarpaat, Inatsisartunilu partiit tamarmik isumaqataallutik.
Inunnik isumaginninnermut siunnersortitut Nunatsinni atorfillit katillutik 26-upput, taakkunannga 17-it Kommuneqarfik Sermersuumi atorfeqartuullutik. Tassa imaappoq, inunnik isumaginninnermut siunnersortitut sinerissap sinnerani atorfillit qulingiluaannaapput.
Meeqqanik sumiginnagaasimasunik sullissinermi sulisut taamaammat piginnaanngorsarneqarnissaat pillugu aningaasanik immikkoortitsisoqarsimasoq, Ilaqutariinnermut Inatsisinillu Atuutsitsinermut Naalakkersuisup Martha Lund Olsenip Radioaviisimut oqaatigaa.
Meeqqallu Illersuisuata kissaataanut tamanna naapertuulluinnarpoq, tassami inunnik isumaginninnermut siunnersortinik amerlanerusunik sulisoqalernissaq, piginnaanngorsarneqarsimasunillu sulisoqarnissaq, taassuma kissaatigimmagu.
Kommuninullu ataatsimoortunik tapiissutinut atatillugu isumaqatigiinniartoqarnissaa eqqarsaatigalugu, Naalakkersuisut, Inatsisartullu, kommuninik tusaaniagaqarnissaat, Aaja Chemnitz Larsenip neriuutigigaluaraa, meeqqat pisinnaatitaaffii pillugit Naalagaaffiit Peqatigiit aalajangersagaa kommunit ilaanni ullumikkut ilaatigut eqquutsinneqanngitsoq, taassuma oqaatigaa:
- Naalagaaffiit Peqatigiit meeqqat pisinnaatitaaffii pillugit aalajangersagaat ilaatigut eqquutsinneqanngilaq, pingaartumik immikkoortut pingajuat. Tassa sulisut naammallutillu ilinniarsimasuunissaannik piumasaqaat matumani eqqarsaatigaara, Meeqqat Illersuisuat Aaja Chemnitz Larsen, oqarpoq.
