Meeqqat illersuisuata iliuusissatut pilersaarut isornartorsioraa: Angusaqarluarnianngitsoq ersarinngitsorlu
Nunatsinni meeqqat kinguaassiutitigut naapertuilluanngitsuliorfigineqannginnissaat imaluunniit nakuuserfigineqannginnissaat qanoq ililluta qulakkiissavarput? Meeqqat pisariaqartumik ikiorneqarnissaat, tapersersorneqarnissaat aamma ilinniartinneqarnissamut ilinniagaqarnissamullu periarfissaqarnissaat qanoq qulakkiissavarput?
Tamatumanik allarpassuarnillu Naalagaaffiit Peqatigiit meeqqat pillugit isumaqatigiissutaanik malinninniarnermi iliuusissatut pilersaarut nutaaq iluaqutaassaaq.
Inatsisartut iliuusissatut pilersaarummik taama ittumik Naalakkersuisut 2015-imili suliakkernikuuaat. Maanna ukiut arfineq-marluk qaangiuttut Naalakkersuisut iliuusissatut pilersaarummut missingiuteqarput, tamannali Meeqqat illersuiannit, Aviâja Egede Lyngemit isornartorsiorneqangaatsiarpoq.
- Naammattumik missingiusiaanngilaq, siuarsaarusuttuunngilaq, nunarput tamakkerlugu ataqatigiissaarinermik takusaqarsinnaanngilagut. Kommunit innuttaasullu uani qanoq ilaatinneqarnissaat takusinnaanngilarput.
- Taamaammat iliuusissatut pilersaarut amigarluinnartut erseqqarinngitsutullu isigaarput, Aviâja Egede Lynge oqarpoq.
AAMMA ATUARUK Naalakkersuisut: FN-ip Meeqqat pillugit Isumaqatigiissutaata inatsisinngortinnissaa akisussaqaaq
Kommunit innuttaasullu peqataatinneqarnissaat amigaataasoq
Aviâja Egede Lynge MIO-mi Meeqqanut illersuisuuvoq, MIO meeqqat pisinnaatitaaffiinik nunatsinnilu atugassarititaanik suliaqartarpoq. Illersuisup isornartorsiuingaatsiarnera kommunit sumiiffiinnilu innuttaasut peqataatinneqannginnerannik pissuteqarneruvoq.
Taassuma iliuusissatut pilersaarut Namminersorlutik Oqartussat qitiusumik allaffeqarfiannuuginnarnera isornartorsiorpaa, nunatsinnilu tamarmi suliassamik qnaoq kivitsinissamut siunnersuutinik amigaateqarluni.
- Nuna tamakkerlugu sunik qanorlu kivitsisoqarnissaanik ersarissumik takutitsisumik iliuusissamik pilersaaruteqarnissaa pisariaqartipparput.
- Iliuusissatut pilersaarut una ersernerlulluinnarpoq, aamma suliaq suna kimit suliarineqassanersoq takutinneqanngilaq, Meeqqat illersuisuat oqarpoq.
MIO iliuusissamik pilersaarummik naalakkersuisut kommunalbestyrelsillu angusaqarusulluartumik piffissamullu ungasinnerusumoortumik peqalernissaa ujartugariuarsimavaa, Aviâja Egede Lyngellu oqarnera naapertorlugu tamanna uani anguneqanngilaq. Iliuusissatulli pilersaarut nutaaq Naalakkersuisunit suliniutaareersunik eqikkaaneruinnarpoq.
Suliniutiviit amigaatigigai
Meeqqat illersuisuata iliuusissatut pilersaarutip sammisaanut ajornartorsiutaasorpassuarnut aalajangersimasunik aaqqiissuteqartoqarnissaa amigaatigaa. Maannakkutut itsillugu kommunitut unammillernartunut aalajangersimasunut aaqqiiniarnissamut qanoq iliortoqarnissaa takuneqarsinnaanngilaq.
- Assersuutigalugu meeqqanut kinguaassiutitigut naapertuilluannginnerit qiviarutsigit. Namminersorlutik Oqartussat qanoq iliussappat, kommunit qanoq iliussappat, innuttaasut qanoq iliussappat, suliffeqarfiit pisortanut atassuteqanngitsut qanoq iliussappat?
- Pilersaarut taama ittoq amigaatigaara, tamannalu takusinnaanngilara, Aviâja Egede Lynge oqarpoq.
Naalakkersuisut Meeqqat illersuisuata isornartorsiuinera iliuusissatut pilersaarummik suliaqaqqinnissaminnut isiginiarneraat takujumaarparput.
Meeqqanut, Inuusuttunut Ilaqutariinnullu Naalakkersuisoqarfimmi iliuusissatut pilersaarut Naalakkersuisunit suli akuerineqanngimmat tamatumunnga oqaaseqarsinnaannginnerarpoq.
Uani ataani MIO-p oqarnera naapertorlugu Naalagaaffiit Peqatigiit meeqqat pillugit isumaqatigiissutaannit nunatta sorliit malinngikkai takusinnaavatit:
