Meeqqat illersuisuat meeqqat pisinnaatitaaffiisa atuutilerneranit ukiut 30-nngornerat pillugu: Suli eqqunngitsuliortoqarpoq

Nunatta Naalagaaffiit Peqatigiit Meeqqat Pisinnaatitaaffii pillugit isumaqatigiissutaannut ilanngunneranit ukiut 30-t qaangiupput. Meeqqalli pisinnaaitaaffii pillugit ukiorpassuarni suliaqartoqareeraluartoq meeqqanut siunissagissaarnerulersitsinissamut aqqut suli takeqisoq, meqqat illersuisuat isumaqarpoq.

Allattoq Mikkel G. Rasmussen

maajip 11-at 2023 07:02

Maajip ulluisa 11-at 1993.

Tassa ulloq nunatta Naalagaaffiit Peqatigiit Meeqqat Pisinnaatitaaffii pillugit isumaqatigiissutaannik pisussaalerfia.

Atsiorneq nunatta isumaqatigiissutip immikkoortuinik 54-inik malinnittussanngorneranik aamma atuutilersinneqarnissaannik sulissuteqalernissaanik isumaqarpoq.

Sulinerup aallartinneranit maanna ukiut 30-t qaangiulluinnarput.

Naalli ukiorpassuit ingerlareersimagaluartut nuannaarutissat amerlavallaanngitsut, Meeqqat Illersuisuat, Aviâja Egede Lynge isumaqarpoq.

- Eqqarsaatigigutsigu, maanna ukiut 30`it qaangiussimalereersut, Nunarput Naalagaaffiit Peqatigiit Meeqqanut Isumaqatigiissutaat akuerimmassuk, pakatsinaqaaq takussallugu meeqqat inuusuttullu pitsaanerusumik atugassaqartinneqanngimmata, meeqqat illersuisuat tusagassiuutinut nalunaarummi oqarpoq.

Taamaammat ukiunik 30-nngortorsiorneq meeqqat inuusuttullu siunissagissaarnerulernissaanik qulakkeerinissamut iliuuseqartoqarnissaanut atorneqarnissaat tassunga nalunanngilaq.

Aamma atuarukMeeqqat illersuisuata iliuusissatut pilersaarut isornartorsioraa: Angusaqarluarnianngitsoq ersarinngitsorlu

Suli aqqut takisoq

Naalakkersuisut nunatta Naalagaaffiit Peqatigiit meeqqat pisinnaatitaaffii pillugit isumaqatigiissutaannik piffissami 2023-mit 2030-mut malinninnissamut iliuusissatut pilersaarut 2022-p naanerani saqqummersippaat.

Iliuusissatut pilersaarut 24-nik suliniutertaqarpoq, taakkulu tamarmik meeqqanut tamanut, paaqqutarinniffinnut isumassuisunullu tunngapput.

ILIUUSISSATUT PILERSAARUMMI SULINIUTIT:

Suliniutit assigiinngitsunik tallimanik katillugu ukkataqarput:

Meeqqat isumaat.
Ilaqutariit, toqqissimaneq sinaakkutillu.
Nakuusertarnermut, innarliinermut atornerluinermullu illersuineq.
Ilinniartitaaneq ineriartornerlu.
Peqqinneq inuuniarnerlu pitsaasoq ineriartornermik qulakkerinnittoq.

Iliuusissatulli pilersaarut amigaateqarlunilu sammiveqanngitsoq, Aviâja Egede Lynge isumaqarpoq:

- MIO-p ilisimasanik katersuinera Nuna tamakkerlugu ingerlasup ersarivissumik takutippaa, Meeqqat Isumaqatigiissutaanni allaaserisat 19-it suli malinneqanngitsut, tassanilu pineqarluni meeqqanut kanngunarsaanerit ilungersunartut, taanna oqarpoq, nangillunilu:

- Ukiut 30-t tulliuttut taamatut ingerlaqqunanngeqaat naammattumik iliuuseqartoqarani, taamaanniarunimi meeqqat inuusuttullu kinguaariit arlallit annaasussaavugut.

Meeqqat illersuisuatali politikerit ukiuni kingullerni peqataalluariartulersut oqartussaaffimmillu ilungersunartumik tigusisut misigisimavaa.

Taamaakkaluartorli politikerit nunatsinni meeqqanut ilaqutariinnullu ikiuinissamik qulakkeerinissaamut ikiuinissamullu aningaasanik pisariaqartunik immikkoortitsinissamut maanna alloriarnissaat pisariaqarsoraa.

Iliuusissatut pilersaarut nutarterneqassasoq

Iliuusissatut pilersaarut siorna ukiakkut suliarineqartoq naammannersoq pillugu apeqqut upernaakkut ataatsimiinnermi maajip aappaani oqaluuserineqarpoq.

Tassa Inatsisartunut ilaasortat Inuit Ataqatigiit siunnersuutaat Naalakkersuisut Naalagaaffiit Peqatigiit Meeqqat pillugit isumaqatigiissutaannik malinninnissamut iliuusissatut pilersaarummik nutaamik suliaqaqquneqassanersut siullermeerlugu oqaluuseraat.

Nunami tamakkerlugu pilersaarut amigaataasoq aamma meeqqat pisinnaatitaaffiisa qulakkeernissamut anguniakkap sulissutigilernissaanut piffissanngortoq IA isumaqarpoq.

Aamma atuarukMIO periusissaq pillugu: Innuttaasut akuutinneqarnissaanut aningaasaliisoqartariaqarpoq

Siunnersuut Inatsisartuni oqaluuserineqareermat atortussanngortinneqarnissaa Naalakkersuisut aalajangerpaat taamaammallu siunnersuut maanna Ilaqutariinnut Peqqinnissamullu ataatsimiititaliamiilerpoq.

Siunnersuut akuerineqavippat iliuusissatut pilersaartut utaqqisaarutaasumik aaqqiniarneruinnassanngitsoq Meeqqat Illersuisuata neriuutigaa.

- Iliuusissamik pilersaarusiornissaq Naalagaaffiit Peqatigiit Meeqqanut Isumaqatigiissutaat malinneqarnissaa siunertaralugu, iliuusissatut pilersaarut massakkut pilersaarutaasumut naleqqiullugu angusaqarusussusermik aamma tamat sianigalugit pilersaarusiatut sananeqartariaqarpoq. Taamaliunngikkutta ukiut 30-it qaangiuppata unamminartut taakkoqqinnaat suli isigisimassavagut, Meeqqat Illersuisuat oqarpoq.

Ukiunik 30-nngortorsiorneq Nuummi katuani sisamanngornermi unnukkut malunnartinneqassaaq, tassanilu Mimi Karlsen aamma UNICEF Danmarkimi generalsekretæri, Susanne Dahl ilaatigut oqalugiassapput.