Umimmaat unguukkat neqqaarissut
Umimmanniarnermut peqqussut allanngortinneqarnissaanut akuersisoqarpat, ungooraluni umimmanniartoqarsinnaassalluni.
- Piniartut tunisinerminni aningaasarsissutissaat amerlanerulersinnaassapput umimmannik toqunneqalinnginnerminni malersugaasimanngitsunik umimmattoqartalerpat, Aksel Blytmann, KNAPK´mi siunnersorti oqarpoq.
KNAPK Kangerlussuarmi siunissami qanoq umimmanniartarsinnaanermut pilersaaruteqarpoq. Kattuffiullu pilersaarutaasa ilagaat nunani immikkut akuerisaasuni umimmannut ungalunik ikkussisoqartassasoq.
Piniartut Maniitsumeersut, Sisimiuneersut Kangerlussuarmeersullu Kangerlussuup sineriaani kujataani snescootererlutik aamma qamutinik assakaasulinnik, 4-hjulstrækkerinik pineqartartunik, ullumikkut umimmanniartarput.
- Umimmannik ungusisoqartalerpat piniartut orsussamut aserortoortarnernullu aningaasartuutigisartagaat taamaalillutik ikinnerulissapput, Aksel Blytmann oqarpoq, erseqqissaallunilu umimmaat qiviuinik katersisarneq aamma pisariinnerulersinnaassammat.
Taakkuinnanngillalli:
- Nuna immikkut akueralugu ungussiffigineqartartup avatangiisia aamma aserorterneqarpallaarunnaassaaq, Aksel Blytmann erseqqissaavoq.
Umimmanniartarnermut nalunaarut allanngortissallugu Piniarnermut Naalakkersuisoqarfimmi maannakkut suliarineqarpoq, umimmannik ungoorisinnaaneq nalunaarummi ilanngunniarneqarluni, KNAPK´mi siunnersorti oqarpoq.
Nalunaarummi allannguutissat maannakkut nalilersorneqartut, Amalie Jessen, Aalisarnermut, Piniarnermut Nunalerinermullu Naalakkersuisoqarfiup pinianermut immikkoortortaqarfiani allaffimmi pisortaq KNR-mut erseqqissaalluni oqarpoq.
Kangerlussuup timaani immikkut akuerisaasumi misilittaalluni umimmannik ungoorisoqartareerpoq. Misiliinerup takutippaa umimmaat unguussallugit ungalusallu iluaniitissallugit piuminartuusut. Misileraanerli malitseqanngilaq.
Nunamut Namminermut, Pinngortitamut Avatangiisinullu Naalakkersuisoqarfiup Kangerlussuup nunataata aqutsivigineqarnissaanut pilersaarutaani, 2010-mi allanneqarsimasumi allassimasoqarpoq, Kangerlussuup nunataa tamarmi maannakkut 10.000-nik umimmaqartoq, taakkunannga Kangerlussuup sineriaata kujataani maannakkut 7.000 – 8.000-nik umimmaqarluni.
Umimmappassuilli aamma piaqqiortuaramik suli amerliartuinnarput.
- Tamanna piniartunut piniagassaqarfissuuvoq, umimmaqatigiilli tamaaniittut amerlavallaalersinnaapput. Umimmaat amerlivallaarlutik ajalusooriasaarsinnaanerat tamaani umimmanniartarnermut akornusiisinnaalluni. Umimmaqatigiit tamaaniittut 5.000-it missaannut ikilisinneqartariaqaraluarput, taama Kangerlussuup nunataata aqutsivigineqarnissaanut pilersaarummi erseqqissaasoqarpoq.